Jahandaný dáýirinde ult bolyp qalý úshin ulttyq kodty saqtaýdyń mańyzy zor - Qaırat Mámı
Keleli jıynda sóılegen sózinde ol: «Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda HHІ ǵasyrdaǵy ulttyq sanany damytý joldaryn usyndy jáne rýhanı jańǵyrýdyń eń basty sharty - ulttyq kodty saqtaý qajettigin atap kórsetti. Rasynda, qazirgi jahandaný dáýirinde ulttyq kodymyzdy saqtaýdyń mańyzy zor. Biz jat ıdeologııalardyń yqpalyna ózimizdiń ulttyq qundylyqtarymyz arqyly tótep bere alamyz. Sondyqtan da biz halqymyzdyń baı mádenıeti men salt-dástúrin búgingi zamanmen úılestire otyryp, ulttyq sana-sezimniń kókjıegin keńeıtýimiz qajet», - dedi.
«Ulttyq jańǵyrý degen uǵymnyń ózi ulttyq sananyń kemeldenýin bildiredi. Onyń eki qyry bar: Birinshiden, ulttyq sana-sezimniń kókjıegin keńeıtý. Ekinshiden, ulttyq bolmystyń ózegin saqtaı otyryp, onyń birqatar sıpattaryn ózgertý» degen Elbasy sózinde tereń mán bar ekendigin aıta kele Qaırat Mámı: «Birtutas ult bolyp uıysyp otyrǵan qazaqstandyqtardyń berekesi men birliginiń negizi - qazaq ultynyń bolmys-bitiminde. Sonyń ishinde halqymyzdyń san ǵasyrlyq salt-dástúri men ádet-ǵuryptarynyń orny erekshe. Sondyqtan da biz bılerden qalǵan ádil bılik aıtý dástúrin jańǵyrtýymyz qajet.
Ulttyq salt-dástúrin erte zamannan-aq sana-túısigimen boıyna sińirip, ony ult kodyna aınaldyra bilgen elmiz. Osy oraıda Alash qaıratkeri Mirjaqyp Dýlatovtyń: «Zań ádet-ǵurypqa qaıshy kelse - úlken aıaqqa tar etik kıgenmen birdeı» degen sózin búgingi zańgerler bilgeni jón», - dedi.