«Jaǵdaıy aýyr». Aqtóbede 3 jasar qyzdy kólik basyp ketti

<p>AQTÓBE. KAZINFORM — Aqtóbede aýlaǵa júgirip shyǵyp, oıyn alańyna qaraı bettegen 3 jasar qyz kólik astyna túsip qaldy. Rólde bolǵan adam ishimdik ishpegen.</p>

Oqıǵa Aqtóbe qalasy Eset batyr turǵyn alabynda boldy.

Oblystyq PD baspasóz qyzmetiniń habarlaýynsha, 29 jastaǵy júrgizýshi ishimdik ishpegen.

— 1 jeltoqsan kúni saǵat 15:20–da Toyota kóliginiń júrgizýshisi 2021 jyly týǵan qyz balany qaǵyp ketti. Qazirgi kezde bala aýrýhanada. Osy oqıǵaǵa baılanysty Qylmystyq kodekstiń 345-baby boıynsha is qozǵaldy, tergeý júrip jatyr, — dedi Aqtóbe oblystyq PD baspasóz qyzmeti.

Qazirgi kezde kólik aıyp turaǵyna qoıyldy. Al dárigerler balanyń jaǵdaıy týraly aıtty.

— Aýrýhanaǵa ákelgen boıda qabyldaý bóliminen soń reanımatsııa jáne qarqyndy emdeý bólimine jatqyzyldy. Jalpy jaǵdaıy durystalǵannan keıin travmatologııa bólimine aýystyryldy. Jaǵdaıy aýyr. Bas-mı jaraqaty, mıdyń shaıqalýy bar. Jambas súıegi synǵan. Balanyń qasynda anasy bar, — dedi oblystyq kópsalaly balalar aýrýhanasynyń travmatolog dárigeri Qýantaı Mahambetov.

Eske salsaq, Almaty qalasynyń kireberisinde ornalasqan «Asyl Arman» turǵyn úı kesheniniń aýmaǵynda oqýshyny avtobýs basyp ketti.