Jaǵajaıdy kisi ólimi tirkelgende ǵana teksere alamyz — mınıstr

<p>ASTANA. KAZINFORM — Sýdaǵy ólim-jitimniń 95% shomylýǵa tyıym salynǵan oryndarda tirkeledi. Alaıda ruqsat etilgen oryndarda da adam ólimi bolady. Tótenshe jaǵdaılar mınıstri Shyńǵys Árinov tekserý jumystaryn kúsheıtýdi usynyp otyr. </p>

«Sýǵa batyp ketkenderdiń 95% shomylýǵa tyıym salynǵan oryndarda tirkeledi. Osylaısha ákimdiktermen birlesip, sýǵa shomylý men demalýǵa ruqsat etilgen oryndardy jyldan-jylǵa ulǵaıtyp jatyrmyz. Onyń sany búgin 708-ge jetti jáne bári 2GIS platformasynda ornalasqan», — dedi Sh. Árinov Úkimet otyrysynda. 

Maýsym aıynyń sońyna deıin qosymsha taǵy 33 jaǵajaı ashylady. Degenmen, olardyń sany áli de jetkiliksiz.

«Keıbir jaǵajaılar belgilengen talaptar men sanıtarlyq normalarǵa sáıkes kelmeıdi, sonyń saldarynan jazataıym oqıǵalar bolady. Mysaly ótken jyly ruqsat etilgen demalys oryndarynda 5 adam sýǵa batyp ketti. Taǵy bir toqtalatyn jaıt, demalýshylar belsendi túrde gıdrotsıklderdi paıdalanady, al olardy durys paıdalanbaý qaza bolý qaýpine ákelýi múmkin», — dedi TJ mınıstri. 

Іshimdik iship, mas kúıde sýǵa shomylý adam ólimine ákeletinin eskerip, mınıstrlik polıtsııamen birlesip ruqsat etilgen jáne tyıym salynǵan oryndarda patrýldeý men reıdter ótkizedi.

Jyl basynan beri 26 myńnan asa osyndaı shara júrgizilip, quqyq buzǵan 3 myńǵa jýyq adam, bıylǵy 1 maýsymnan bastap — 49 adam ákimshilik jaýapqa tartyldy.

Kásipkerlik kodeksine sáıkes, mınıstrlik jaǵajaılarǵa adam ólimi faktileri tirkelgen jaǵdaıda ǵana tekserý júrgize alady.

Osyǵan baılanysty ákimdikter ruqsat bergen kezde demalys oryndarynyń ınfraqurylymyn baqylaýdy kúsheıtý qajet.

Sondaı-aq, Kólik mınıstrligi shaǵyn kólemdi kemelerdi tekserýi kerek.

«Ótken jyldan bastap Almaty jáne Pavlodar qalalarynyń ákimdikteri pılottyq rejımde sýǵa batqandardy erte anyqtaý júıesin iske qosty. Beınebaqylaý men monıtorıng jasaýdyń osyndaı júıelerin barlyq óńirlerge, ásirese tyıym salynǵan jerlerge ornatý qajet. Bul adam ólimin azaıtýǵa múmkindik beredi», — dedi Sh. Árinov.