Jaǵalassaq ta jaǵa jyrtysýǵa, onyń artynan adam óltirýge bolmaıdy –Nurtóre Júsip
«Qordaı janjaly janǵa maza taptyrar emes. Qaza tapqan qandastar otbasyna qaıǵyryp, kóńil aıtamyn. Áleýmettik jelige kúnige júz ret kirip, ár habarǵa qaıta-qaıta qaraımyn.
Ashynǵandar bar. Arandaǵandar bar. Arandatýshylar da bar sııaqty... Kináli kim? Janjal neden bastaldy? Jaǵdaı nege ýshyqty? Osynyń bárine kináli kim degen suraqtyń tóbesi qyltıdy. Anadan kórý, mynadan kórý, jappaı tártipsizdikke shaqyrý oryn alyp ta jatyr», - deıdi senator.
Onyń pikirinshe, osyndaıda basý aıtylýy kerek.
«Biz eldik, memleketshildik qundylyqtardy birinshi kezekke shyǵara almaı kelemiz. El bolǵan soń teli men tentek bolmaı turmaıdy. Tezge salatyn kim? Memleket! Daýlasýǵa bolady. Aıtysaıyq. Tartysaıyq. Qyzyl keńirdek bolyp, óz pikirimizdi dáleldeýge tyrysaıyq. Tipti jaǵalasaıyq... Jaýlasýǵa bolmaıdy! Jaǵalassaq ta jaǵa jyrtysýǵa, onyń artynan adam óltirýge bolmaıdy. Aıtysyp, tartysyp, kelip-kelip qaı jerde toqtaýymyz kerek? Memleket degen jerde! Qazaq memleketi bolmasa – biz kimbiz? Kimge sózimiz júrgendeı? Kimge basymyzdy kóterip, kimge týra qaraı alǵandaımyz? Eńsemizdi osy el – óz memleketimiz úshin kóterip júrgen joqpyz ba? « - dep atap ótti Nurtóre Júsip
«Qazaqstan Prezıdenti Qasym-Jomart Toqaev – memleket basshysy retinde janjaldy retteýge, jaǵdaıdy baqylaýǵa alýǵa óte sergek qarady. Tez reaktsııa jasady. Áýeli Twitter-de pikirin bildirdi. Sosyn málimdeme jasady. Úkimet quramynan arnaıy komıssııa qurdy.
El eleńdep otyr. Namysyn taptatqysy kelmeıdi. Túsinemiz. Kinálilerdi anyqtaý, qylmys jasaǵandardy jazalaý, jaǵdaıdy turaqtandyrý sol komıssııa quzyrynda bolar. Birjaqty bolýdan saq bolsaq eken», - deıdi senator.
Onyń aıtýynsha, ádilettilik bolmaǵan jerde áleýmettik qaıshylyqtar týyndaı beredi.
«Túsinistik bolý úshin ne isteımiz? Qandaı amal qylamyz? Memleket degen uǵymdy basty basymdyqqa aınaldyrý úshin ne jasaımyz? Qazir kez kelgenimiz ózimizge «Qazaqstan maǵan qymbat pa?» degen suraq qoıyp kórsek. Qymbat deıtinimiz daýsyz. Qymbat bir zatyńyzdy joǵaltyp alsańyz ne bolady? Jan-jaǵyńyzǵa alaqtaısyz. Sıpalana beresiz. Qaıta-qaıta qaraǵyshtaısyz. Áıteýir janyńyz baıyz tappaıdy. Qazir bárimizdiń basymyzda sondaı jaǵdaı turǵan sııaqty. Bárimiz úshin eń qymbat qundylyq – Qazaq Elin, qazaq memlekettiligin joǵaltyp almaýdy oılasaq. Osy qaperde tursa! Aınalamyzdaǵy mysyqtileý memleketterdiń oıynshyǵyna aınalyp ketpeýdiń amalyn jasasaq. Bir mezet bárimiz toqtasaq. Oılansaq. Ary qaraı qalaı bolady? Qıraǵan dúnıe-múlik qalpyna keler. Alań kóńil basylar. Tynyshtyq ornar. Tógilgen qannyń óteýi qaıtse tabylady? Tynyshtyqtyń keregi joq pa bizge? Dúrdaraz qaýym qaıta jarasa ma? Álde yryń-jyryń jalǵasa bere me? Bereke men birlik – Memlekettiń memlekettik tilinde! Bir tilde sóıleıtin, bir tilde túsinisetin qoǵamdy ornyqtyra almasaq, Abaı aıtqan «bas-basyna bı bolǵan óńkeı qıqym» deńgeıinen asa almaımyz. Qazaq – tózimdi, shydamdy ult. Talaı qıyndyqqa shydadyq. Namystan jaralǵan halyqpyz. Endigi tańda eldik namys jolynda bolaıyq! «Jalqaý qazaq, beıqam qazaq, epsiz qazaq» degen sóz keltirmeıik!
«Jaýyz qazaq» degen jaman atqa qalmaıyq! Birinshi kezekte ár qazaqtyń balasy óz otbasyn durystaýǵa umtylsa deımin: ulyń betimen ketpesin, qyzyń shekten shyqpasyn, úlkenniń sózi aıaq astynda qalmasyn; mynaý jalpaq eldi toltyratyn urpaq jalǵassyn, solardyń deni saý, bilimdi, ımandy bolyp ósýin qadaǵalasyn; ár áýlet tirshilik kózin – kásibin, násibin tek eńbekten tapsyn; atqa mingen azamattardy aıaqtan shalýdan, aıtaqqa erýden, qyzylkóz qyzǵanyshtan, dabyra men dańǵazadan, ysyrap pen qanaǵatsyzdyqtan saq bolsaq!
Bir-birimizge tek «bolsyn» deıikshi! Qap-qorjynymyzǵa bereke tolsyn deıikshi! Bir kezde «Qazaq qazaqqa bolyspasa, sol qaıǵy» degen maqala jazyp edim. Mynadaı sabyrdyń sýy sarqylyp, abyr-dabyrdyń ahýaly ornyǵyp turǵan shaqta sol sózimdi taǵy da qaıtalaǵym keledi. Ózimizdi eldiń qory dep sezinbeıik. Ózimizdi eldiń zory dep te sezinbeıik. Qazaq bolaıyq!» - dep atap ótti ol.