Jabyq avtoturaqqa gazben júretin kólik qoıǵandar 12 myń teńge aıyppul tóleıdi

NUR-SULTAN. QazAqparat - QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker jabyq avtoturaqqa gazben júretin kólik qoıǵandarǵa qandaı jaza qoldanylatynyn túsindirdi, dep habarlaıdy QazAqparat tilshisi.

«QR Ákimshilik quqyqbuzýshylyq kodeksiniń 410-baby (Órt qaýipsizdigi talaptaryn buzý nemese oryndamaý) boıynsha azamattyq qorǵanys organdary ereje buzǵandarǵa 5 AEK nemese 12 myń teńgeden astam aıyppul sala alady. Sonymen birge, quqyq buzýdyń saldary aýyr bolsa, Qylmystyq Kodekstiń 292-babynda arnaıy jaza kózdelgen. Oqıǵanyń aýyrlyǵyna qaraı, aıyppul nemese bas bostandyǵynan aıyrý jazalary qoldanylady. Eki nemese odan da kóp adam qaza tapsa - 5-10 jyl aralyǵynda bas bostandyǵynan aıyrylýy múmkin», - dedi komıtet tóraǵasy Ortalyq kommýnıkatsııalar qyzmetinde ótken baspasóz máslıhatynda.

2019 jyldyń jeltoqsanynda QR órt qaýipsizdigi erejelerine ózgertýler men tolyqtyrýlar engizgen Úkimet qaýlysy qabyldandy, onda gazben júretin kólikterdiń jabyq parkıngterge kirýine tyıym salyndy.

Jalpy órt qaýipsizdigi erejelerine 148 ózgerister men tolyqtyrýlar engizildi.