Jábirlenýshilerge ótemaqy tóleý qory segiz aıda 93,7 mln teńge tólegen

NUR-SULTAN. QazAqparat - Jábirlenýshilerge ótemaqy berý qory 8 aıda 93,7 mln teńge tólegen. Bul týraly QR Іshki ister mınıstrligi tergeý departamentiniń bastyǵy Sanjar Ádilov ortalyq kommýnıkatsııalar qyzmetinde aıtty, dep habarlaıdy QazAqparat tilshisi.

«2021 jyldyń 8 aıynda 720 jábirlenýshige jalpy somasy 93 723 000 teńge ótemaqy tólendi. Ótken jyldyń osyndaı kezeńimen salystyrǵanda ótem alǵan jábirlenýshilerdiń sany - 3 ese, tólengen qarajat kólemi - 4 ese artyq. Azyq-túlik sebetindegi baǵalardyń aıtarlyqtaı ósýin, jalpy halyq ómiriniń qymbattaýyn eskere otyryp, ІІM Qarjy mınıstrligine ótemaqynyń mólsherin arttyrý týraly usynysty joldady», - dedi ІІM ókili.

Sanjar Ádilovtiń aıtýynsha, Qylmystyq kodekstiń 46-babyna sáıkes, qylmystardyń 124 quramy boıynsha jábirlengender ótemaqy alady jáne olar ózara úsh sanatqa bólinedi.

Birinshi sanat – seksýaldyq zorlyq-zombylyqpen baılanysty qylmystar boıynsha jábir kórgen kámeletke tolmaǵandar, adam saýdasymen jáne azaptaýlarmen baılanysty jábirlengender (22 quram boıynsha). Mundaǵy ótemaqynyń mólsheri – shamamen 90 000 teńge.

Ekinshi sanat – densaýlyǵyna aýyr zııan keltirilgen ne adamnyń ımmýn tapshylyǵy vırýsyn juqtyrǵan adamdar (42 quram boıynsha). Ótemaqynyń mólsheri – shamamen 120000 teńge.

Úshinshi sanat – jábirlenýshi qaıtys bolǵan jaǵdaıda, jábirlenýshiniń quqyqtary berilgen adamdar (60 quram boıynsha). Ótemaqynyń mólsheri – shamamen 150000 teńge.