Jábirlenýshi sotta bıznesin Gúlmıra Satybaldy qalaı tartyp alǵanyn aıtty
2016 jyly Tursynǵalı Alagózov burynǵy áıeli Laısıra Maratpen ajyrasty. Ol tapqan múlkin áıeli men balalaryna óz erkimen qaldyrdy. Alaıda burynǵy áıeli Tursynǵalı Alagózovke tıesili Galanz Bottlers kompanııasynyń aktsııalaryn bólýdi talap etti.
«Jubaıym aktsııany bólýdi talap etip, men dırektorlar keńesiniń tóraǵasy laýazymynda ıaǵnı bıznes basshysy bolyp qala beretindigimdi aıtyp sendirdi. Men oǵan senip, kompanııanyń 43,25% aktsııasyn syıǵa tarttym. Ol mamandyǵy boıynsha zańger. Burynǵy áıelim meni quryǵyna túsirip qalǵan aktsııalardy ıemdenýge tyrysyp, sotqa júgine bastady», - dedi Tursynǵalı Alagózov sot barysynda.
Onyń aıtýynsha, tanysy Berdiqulov arqyly Rıfshanovtyń zań kompanııasyna júginýge májbúr bolǵan. Óıtkeni T. Alagózovke «Galanz Bottlers» dırektorlar keńesiniń tóraǵasy laýazymyn qalpyna keltirýine zań kómegi qajet boldy.
«1,5 jylǵa sozylǵan reıderlik faktisi boıynsha qylmystyq is qozǵaldy. Rıfshanovtyń zańgerleri múlikti bólý qaýpin boldyrmaý úshin qalǵan aktsııalardy (43,25%) meniń senimdi adamdarymnyń atyna qaıta jazýdy usyndy. Men Berdiqulovtyń atyna 3% jáne Rıfshanovtyń atyna 40,25% aktsııany jalǵan tirkedim. Olar meniń aktsııalarymnyń nomınaldy ıeleri boldy», - dep túsindirdi jábirlenýshi.
Alaıda, Tursynǵalı Alagózov aktsııalardyń naqty ıesi bolyp qala berdi.
«2018 jyldyń kúzinde maǵan Berdiqulov habarlasyp, oǵan Qaırat Satybaldy qońyraý shalyp, Rıfshanov ekeýinen aktsııalardy Gúlmıra Satybaldyǵa berýdi talap etkenin aıtty. Gúlmıra Satybaldy olardy, ıaǵnı Rıfshanov pen Berdiqulovty kezdesýge shaqyrǵan. Berdiqulovtyń aıtýynsha, kezdesýde Satybaldy azamattyq jáne qylmystyq isterdi toqtatyp, aktsııalardy tapsyrýdy talap etken. Al Berdiqulov pen Rafshanov qorqyp, abdyrap qalǵan. Men bul adamdarǵa qarsy tura almaıtynymdy túsindim», - dep túsindirdi T. Alagózov.
Keıin Tursynǵalı Alagózov Gúlmıra Satybaldymen kezdesken.
«Gúlmıra Satybaldymen sóılesip, bul meniń burynǵy áıelime qatysty otbasylyq is ekenin aıttym. Sonymen qatar máseleni ózim sheshetindigimdi aıta kele, iske aralaspaýyn suradym. Men oǵan birneshe ret aıttym, biraq tyńdaǵysy kelmedi. Sońynda maǵan kelisýge týra keldi, óıtkeni, memlekettiń alǵy adamdarymen kúrese almaıtynymdy túsindim, odan paıda joq. Men Rıfshanov pen Berdiqulovqa aktsııalardy qaıta jazýǵa kelisim berdim. Aktsııalardy berý alý-satý shartyn resimdeý arqyly júzege asyryldy. Onda bir aktsııanyń quny 1 teńgemen belgilendi, al naryqta bir aktsııa shamamen 200 teńgeni qurady, ıaǵnı 200 ese aıyrmashylyq boldy», - deıdi jábirlenýshi T. Alagózov sot barysynda.
Eske salaıyq, G.Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergelgen edi. Jábirlenýshige kelgen zalal somasy - 6,6 mlrd teńgeden asady.
Buǵan deıin belgili bolǵandaı, Antıkor Gúlmıra Satybaldy adam urlaý faktisi boıynsha tergelip jatqany týraly habarlady.
Ótken jyly 18 naýryzda elorda soty Gúlmıra Satybaldyny 2 aı merzimge qamaýǵa alýǵa sanktsııa bergen edi.
Gúlmıra Satybaldy Qaırat Satybaldynyń burynǵy áıeli.