«Jabaıy saýda jaǵdaıdy ýshyqtyryp tur» - respýblıkalyq basylymdarǵa sholý

ASTANA. 31 shilde. QazAqparat - Qazaq aqparat agenttigi respýblıkalyq basylymdarda 31 shilde, seısenbi kúni shyqqan ózekti materıaldarǵa sholýdy usynady.

***

Ulttyq Bank basshysy Grıgorıı Marchenkonyń pikirinshe, bizge keminde kelesi jyldyń naýryz aıyna deıin «álemdik ekonomıkanyń jaı-kúıin keshýge» jáne shıkizat taýarlaryna álemdik baǵalardyń joǵary qubylmalylyǵy men valıýta baǵamdarynyń turaqsyzdyǵy jaǵdaılarynda ómir súrýge týra keledi. Tıisinshe, álemdik trendterdiń Qazaqstan ekonomıkasyna áser etýin kútken jón. Osy sharasyz jaǵdaıdy halyqtyń kópshiligi túsinedi. Másele elimizdiń ekonomıkasy men qarjy júıesiniń álemdik naryqtardyń qubylmalylyǵyna qanshalyqty daıyn ekendiginde, otandyq qaýipsizdik jastyqshasynyń beriktigi men senimdiligi qalaı baǵalanady, respýblıka ótken birinshi jartyjyldyqta óziniń ishki jáne syrtqy ekonomıkalyq ustanymdaryn nyǵaıta aldy ma degen suraqtarda. Osy saýaldardy «Egemen Qazaqstan» gazeti QR Ulttyq Bankiniń tóraǵasy G.Marchenkoǵa qoıǵan. Suhbat «Ulttyq Banktiń aqsha-kredıt saıasaty álemdik naryqtardyń joǵary qubylmalylyǵyn eskerýde» degen taqyryppen berilgen.

***

«Reseı prezıdenti V. Pýtın  keshe el ómirindegi eleýli oqıǵa bolmasa da, ózekti másele bolyp tabylatyn «Jala jabý týraly» zańǵa qol qoıdy. Ol osy arqyly Reseı Federatsııasy Qylmystyq kodeksiniń «jala jabý» babyn qaıta qalpyna keltirdi», - dep jazady «Aıqyn» gazeti «Ótirik aıtsań óldiń...» degen taqyryptaǵy maqalasynda. Basylymnyń atap ótýinshe, kezinde Memlekettik Dýma men Fe­deratsııa keńesi maquldaǵan bul zańda jurtty eleń etkizgen nárse, budan bylaı áldekimderge dálelsiz jala japqan aza­mattar bes mıllıon teńgege deıin aıyppul tóleıtin bolady. Zańnyń alǵashqy nus­qasynda mundaı áreket úshin túrmege qa­maý qarastyrylǵan. Alaıda bul de­pýtat­tar tarapynan qoldaý tappaǵan edi.

 Sonymen qatar osy basylymda senator Qýanysh Aıtahanovpen aradaǵy suhbat «Básekege qabiletti bolý - basty másele» degen taqyryppen berilgen. Basylym tilshisiniń barlyq saýalyna tuşymdy jaýap bergen halyq qalaýlysy: «Búgingi tańda azyq-túlik ónimderiniń baǵasyn turaqtandyrý máselesi kún tártibinde turǵan eń ózekti másele. Azyq-túlik ónimderi baǵasynyń qymbattaýynyń basty sebebi, taýar óndirýshiler men satyp alýshylardyń arasyndaǵy deldaldardyń kóptigi. Biz osy deldaldardy barynsha azaıtý baǵytynda jumys isteýimiz kerek. Ol úshin taýar óndirýshiler men satýshylardyń arasynda tyǵyz baılanysty yntalandyrý sharalaryna kóbirek kóńil bólý, aýyl sharýashylyǵy ónimderin óndirý, daıyndaý, óńdeý, tasymaldaý, saqtaý, satý máselelerin keshendi túrde damytý, ishki saýda naryǵynyń ınfraqurylymyn jetildirý máselelerin sheshýimiz kerek», -deıdi.

***

«As - adamnyń arqaýy» desek te, astan ýlanǵan jurttyń búginde qarasy kóp. Ásirese jazǵy ýaqytta jemis-jıdekten, onyń ishinde bala túgili eresek adamnyń aýyzynyń sýy qurıtyn qaýyn men qarbyzdan ýlanyp qalǵandar sanynyń eselenýi alańdatarlyq. Sebep: elimizdiń qaı túkpirine kóz júgirtsek te, jabaıy saýdanyń dáýreni júrip tur. Mine osy másele arqaý bolǵan maqala «Alash aınasy» gazetiniń búgingi sanynda «Jabaıy saýda jaǵdaıdy ýshyqtyryp tur» degen taqyryppen berilgen.

 Este bolsa, ótken jyly aqyn, zertteýshi Qasymhan Begmanovtyń «Mustafa Shoqaı jolymen» atty derekti fılminiń Óskemende tusaýkeseri ótken edi. Osydan keıin atalǵan qalada jaryq kóretin «Flesh» atty gazettiń bas redaktory D.Danılevskıı men S.Mıheev óz basylymdarynda M.Shoqaıdy «fashıstermen sybaılas» dep qaralap, eki maqala jarııalaǵan bolatyn. «Alash aınasy» gazetiniń jazýynsha, jaqynda oblystyq sottyń otyrysynda aqynnyń shaǵymy qaralyp, sotta jeńip shyqqan. «Oblystyq sot «Flesh» gazetinde jarııalanǵan jónsiz aqparattardy joqqa shyǵaryp, Begmanov myrzaǵa 100 myń teńge moraldyq ótemeaqy tólep, sot shyǵyndaryn qosa jabýǵa mindettedi», - delingen «Mustafa Shoqaıdy qaralaǵandar sotta ońbaı jeńildi» degen taqyryptaǵy maqalada.