Jabaı ózenindegi sý deńgeıi jarty metrge deıin tómendedi

<p>KÓKShETAÝ. KAZINFORM &ndash; Sý tasqynynan zardap shekken Atbasar aýdanynda tótenshe jaǵdaıdyń saldaryn joıý jumystary jalǵasýda. Jabaı ózenindegi sý deńgeıi jarty metrge tómendep, 5 metrge tústi.</p>

Atbasar aýdany ákimdiginiń málimetinshe, aýdandyq sanıtarlyq-epıdemıologııalyq baqylaý basqarmasynyń mamandary sý tasqyny kezinde halyqqa beriletin aýyz sýdyń sapasyn baqylaý maqsatynda qala kóshelerindegi sýmen jabdyqtaý júıelerinen sý synamalaryn aldy. Saraptama qorytyndysy, jergilikti ákimdik ókilderi atap ótkendeı, jaqyn arada jarııalanady.
Sonymen qatar, Atbasar qalasynyń búlingen kóshe joldaryn qalpyna keltirý, aýlalardaǵy sýdy sorý jumystary júrgizilip jatyr.

Foto: Aqmola oblysy TJD

Zardap shekken turǵyndarǵa keltirilgen materıaldyq shyǵyn kólemi men tólenetin ótemaqy boıynsha ótinishter qabyldaý bastaldy.

Foto: Aqmola oblysy TJD

«Sý tasqynyna qarsy sharalar qabyldanǵannan keıin sý basqan aýmaqtardyń turǵyndarymen kezdesý uıymdastyryldy. Halyqqa materıaldyq zalal tóleý tártibi túsindirildi. Jumys bastalǵan sátten beri barlyǵy 35 ótinish tústi. Zardap shekkenderge qajetti kómek, sonyń ishinde ýaqytsha turý, azyq-túlik jáne medıtsınalyq kómek kórsetiledi», - dep túsindirdi aýdan ákimdiginen.

Aıta ketsek, budan buryn Atbasar aýdanynda sý tasqynyna baılanysty tótenshe jaǵdaı jarııalanǵanyn jazǵan edik.