Jahandyq olımpıadalarda árbir ekinshi qazaqstandyq qatysýshy júldeli oryn alǵan – Tamyz keńesi
«Ótken oqý jyly elimizdiń bilim berý uıymdarynda qyzmet etetin 600 myńǵa jýyq pedagogtyń adal da tynymsyz eńbeginiń arqasynda mańyzdy oqıǵalar men jetistikterge toly boldy. 2023-2024 oqý jylynyń qorytyndysy boıynsha oqýshylarymyzdyń halyqaralyq arenadaǵy júlde qory 424 medalmen tolyqty. Onyń ishinde 50-i altyn», - dedi mınıstr óz quttyqtaýynda.
Mınıstrdiń aıtýynsha eń úzdik jahandyq olımpıadalarda árbir ekinshi qazaqstandyq qatysýshy júldeli oryn ıelendi.
«Munyń ózi sózsiz sizderdiń eńbekterińiz. Memleket basshysynyń jan-jaqty qoldaýynyń arqasynda búginde 3 myńǵa jýyq mektep bir aýysymda bilim berýde. Qosymsha 536 oqýshy ornyna arnalǵan 302 mekteptiń qurylysy júrip jatyr. 1,5 mıllıonnan astam oqýshy tegin ystyq tamaqpen qamtyldy. Sapaly ınternet kórsetkishi 3 ese artty. Balabaqsha tárıbeshileriniń jalaqysy 30 paıyz, al kolledj stýdentteriniń shákirtaqysy 50 paıyz ósti», - dedi Ǵ.Beısembaev.
Ótken jyldyń qyrkúıeginen bastap, barlyq bilim berý uıymdarynda birtutas tárbıe baǵdarlamasy engizildi. Pedagogıkalyq qoldaý ortalyqtaryn ashý arqyly ata-analardyń balany oqytý men tárıbeleý protsesine qatysýy eki ese artqan.
«Aldymyzda qazaqstandyq bilim salasyn damytýdy, jetildirýdi talap etetin jańa mindetter tur. Bul bilim berý sapasyn arttyrý, ınklıýzıvtikti kúsheıtý, bilim berýdi barlyq sanattaǵy balalar úshin qoljetimdi etý, sondaı-aq, balalardyń qaýipsizdigin qamtamasyz etý. Ár mektep jaıly, qaýipsiz bilim beretin orta bolýy kerek, onda árbir bala óz áleýetin ashyp, el ıgiligi úshin damýy qajet. Bizdiń jumysymyzdyń irgeli ustanymdary qaýipsizdik, senim jáne qurmet bolýy kerek», - dedi sala mınıstri.
Aıta keteıik, elordada «Digital Kazakhstan: zamanaýı bilim berý» atty Tamyz keńesi ótip jatyr. Oǵan 500 myńnan astam bilim berý qyzmetkeri onlaın jáne offlaın qatysyp jatyr.