Zeınetke shyqqan joǵary shendi sardarlar kúzetshi bolyp qyzmet etýge májbúr - «Generaldar keńesi» RQB

ASTANA. Aqpannyń 2-si. QazAqparat /Aıdar Ospanalıev/ - Áskerı azamattardyń turǵyn úı máselesi osy saladaǵy eń ózekti problemalardyń biri bolyp otyr. Bul týraly búgin Astanada «Áskerı qyzmetkerlerdiń quqyqtary men zańdy múddelerin qorǵaý» atty jınaqtyń tanystyrylymy barysynda «Generaldar keńesi» respýblıkalyq qoǵamdyq birlestigi Prezıdıýmy tóraǵasynyń orynbasary, general Tursyn Aıjolov aıtty,

dep habarlaıdy QazAqparat.

Shara barysynda jınaqtyń maqsat-mindetteri men áskerılerdiń áleýmettik máselelerin sóz etken general «Men áskerı azamattarmen qarym-qatynas barysynda, olardyń tynys-tirshiligimen tanysý kezinde olardyń quqyqtary men zańdy múddelerin qorǵaýda qanshama problemalardyń qalyptasyp qalǵandyǵyna kóz jetkizdim. Solardyń eń mańyzdylarynyń biri áskerılerdi turǵyn úımen qamtamasyz etýge qatysty. Sonymen qatar, áskerı azamattardyń densaýlyqtaryna, olarǵa medıtsınalyq qyzmet kórsetýmen baılanysty da birshama máseleler bar», dedi tóraǵanyń orynbasary.

Onyń aıtýynsha, qazir ásker salasynda óziniń tolyq mindetteri men quqyqtaryn bile bermeıtin azamattar da kezdesip qalady. «Biz qazir ásker salasynda uzaq jyldar qyzmet etken azamattardy beıimdeý jaǵyna kóńil bólip otyrmyz. Bul baǵytta kóptegen memleketterde arnaıy baǵdarlamalar bar. Olar áskerı azamattardy zeınetkerlikke aldyn ala daıyndaıdy. Al bizdiń sardarlar qazir ózi qyzmet etip júrgen organnan qýylyp shyqqandaı kúı keshýde. Nátıjesinde maıor, podpolkovnık, tipti polkovnık shenindegi sardarlar kúzetshi bolyp qyzmet etip júr. Óıtkeni olardyń «barar jer, basar taýy» joq. Al bul máselemen túptep kegende memleket aınalysýy kerek», dedi general.