Zeınetke shyǵarda volonterlikti eńbek ótili retinde esepke alý usynyldy

NUR-SULTAN. QazAqparat – QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet volonterlerdi yntalandyrý sharalary týraly aıtty, dep habarlaıdy QazAqparat tilshisi.

«Kún tártibine volonterlerdi yntalandyrý máselesi qoıyldy. Osy maqsatta zań shyǵarý jumysy júrgizilýde, onda joǵary oqý oryndaryna, arnaıy-orta bilim berý mekemelerine túsý jáne azamattyq qyzmetke kirý kezinde basymdyq alý bóliginde volonterlerdiń quqyqtaryn keńeıtý usynylyp otyr. Sonymen qatar, zeınetke shyǵar kezde volonterlik qyzmet ótilin esepke alý, memlekettik múlikti alýǵa jeńildikter usyný máselesi qarastyrylýda», - dedi Madııar Qojahmet Ortalyq kommýnıkatsııalar qyzmetinde ótken baspasóz máslıhatynda.

Sonymen birge, Volonter jyly aıasynda alǵash ret «Jyl volonteri» halyqaralyq syılyǵy taǵaıyndalǵan. Ótken jyly ony Qazaqstan, Reseı, Qyrǵyzstannan kelgen 48 belsendi volonter alǵan.

«Volonterlik boıynsha tolyq aqparat QazVolunteer.kz biryńǵaı platformasynda bar. Volonterlikpen aınalysqysy kelgen azamattar tirkele alady, óıtkeni kóptegen sharalar sol platformada kórsetilgen, uıymdasqan toppen jumys isteýge de múmkindikter bar. Qazirgi ýaqytta 47 myńdaı azamat pen 3 myńdaı uıym osy platformaǵa tirkelip, óz sharalary týraly habarlamalardy jarııalaıdy», - dep tolyqtyrdy Madııar Qojahmet.

Buǵan deıin spıker pandemııa jaǵdaıynda volonterlerdiń qalaı jumys istegenin aıtyp bergen edi.