Zeınetaqy jınaqtaryn paıdalaný shetel valıýtasyna suranysty arttyrdy – UB

NUR-SULTAN. QazAqparat – QR Ulttyq bankiniń tóraǵasy Erbolat Dosaev Úkimet otyrysynda dızel otynynyń qymbattaýy men teńge baǵamynyń álsireýne qatysty pikir bildirdi, dep habarlaıdy QazAqparat tilshisi.

«Qyrkúıekte dızel otynyna baǵanyń ósýi 3,8%-ti qurady, al jekelegen oblystarda 10%-ten asty. Óndiristiń ósýine, sondaı-aq eksporttyń toqtatylýyna qaramastan, ınflıatsııalyq qysymdy kúsheıtetin jáne basqa taýarlarǵa janama áser etetin dızel otynynyń tapshylyǵy baıqalady», - dedi ol.

Ulttyq bank tóraǵasy qyrkúıekte jyldyq ınflıatsııa eldegi 13 óńirde jyldam óskenin eske saldy.

«Munaı baǵasynyń aıtarlyqtaı ósýine qaramastan, ishki naryqtaǵy suranys teńgeniń aıyrbastaý baǵamyna qysym kórsetýde. 2021 jylǵy 9 aıda bırjada ekinshi deńgeıdegi bankterdiń satyp alýy 19%-ke ulǵaıdy jáne 2021 jylǵy 7 aıda tutyný taýarlary ımportynyń 25%-ke ulǵaıýy aıasynda ortasha alǵanda aıyna 2,6 mlrd AQSh dollaryna jetti. Fıskaldyq yntalandyrý, zeınetaqy jınaqtaryn paıdalaný da ımporttyń ulǵaıýy men shetel valıýtasyna degen suranystyń ósý faktory bolyp tabylady», - dedi Erbolat Dosaev.