Zeınetaqy jınaqtaryn merziminen buryn paıdalaný kólemi azaıyp keledi – Ulttyq bank
Ulttyq bank tóraǵasynyń orynbasary Álııa Moldabekovanyń deregi boıynsha, bes aıdyń qorytyndysynda zeınetaqy aktıvteriniń kiristiligi 5,3% bolǵan. Jalpy ınflıatsııa kólemi 3,5% bolǵanyn eskersek biryńǵaı jınaqtyq zeınetaqy qory salymshylarynyń kirisi 1,8% mólsherinde saqtalǵan.
«Memleket basshysynyń tapsyrmasyna boıynsha BJZQ salymshylaryna turǵyn úı jaǵdaılaryn jaqsartý, emdelý jáne jeke kompanııalardyń basqarýyna berý úshin zeınetaqy jınaqtarynyń bir bóligin merziminen buryn paıdalanýǵa quqyq berildi. Bıylǵy jylǵy 31 mamyrdaǵy jaǵdaı boıynsha merziminen buryn alý kólemi 1,4 trln teńge boldy. Zeınetaqy jınaqtaryn merziminen buryn paıdalaný bastalǵan sátten beri biz aı saıynǵy alý kóleminiń azaıǵanyn baıqap otyrmyz: bıylǵy jylǵy aqpanda 643 mlrd teńge, naýryzda 302 mlrd teńge, sáýirde 283 mlrd teńge jáne mamyrda 179 mlrd teńge boldy», - deıdi Álııa Moldabekova.
Ulttyq bank ókili birjoly zeınetaqy tólemderin paıdalaný BJZQ-nyń ınvestıtsııalyq portfel sapasyna áser etpeıtinin aıtyp otyr. Sebebi ol negizinen qarjy quraldary boıynsha óteýden jáne salymshylardyń jarnalarynan túsetin shoǵyrlandyrylǵan aqsha qarajaty esebinen júzege asyrylatyn kórinedi.
«Bul rette Ulttyq bank valıýtalyq portfeldi túrlendirý úshin belsendi jumys júrgizýdi jalǵastyrýda. Onyń úlesi bıylǵy mamyrdyń sońynda zeınetaqy aktıvteriniń 32%-yn nemese shamamen 9,5 mlrd AQSh dollaryn qurady. Valıýtalyq portfeldiń qurylymyn aktıvterdiń neǵurlym kiristi synyptaryna ınvestıtsııalaýdy arttyrýǵa kúsh salyndy. Atap aıtqanda, valıýtalyq portfeldiń 25%-ǵa deıingi bóligin jahandyq aktsııalarǵa, 25%-ǵa deıingi bóligin damýshy elderdiń oblıgatsııalaryna, sondaı-aq 20%-ǵa deıingi bóligin ınvestıtsııalyq deńgeıdegi korporatıvtik oblıgatsııalarǵa ınvestıtsııalaý josparlanýda», - deıdi Ulttyq bank tóraǵasynyń orynbasary.