Zeınetaqy jınaqtaryn merziminen buryn alý boıynsha 210,8 myń ótinish oryndaldy

NUR-SULTAN. QazAqparat – QR Ulttyq bankiniń tóraǵasy Erbolat Dosaev zeınetaqy aktıvteri boıynsha bıylǵy jyldyń basynan bergi jaǵdaıǵa túsinik berdi, dep habarlaıdy QazAqparat tilshisi.

«BJZQ zeınetaqy aktıvteri bıylǵy jyldyń basynan beri halyqtyń qarajatty merziminen buryn alýyna baılanysty 0,3 tlrn teńgege nemese 12,6 tlrn teńgege deıin 2,3 paıyzǵa tómendedi. Salymshylar engizgen zeınetaqy jarnalarynyń kólemi 299,1 mlrd teńgeni, zeınetaqy tólemderi 77,1 mlrd teńgeni qurady. Bıyldyń basynan bastap eseptelgen ınvestıtsııalyq tabystyń mólsheri 367,2 mlrd teńgege jetti. Osy jylǵy birinshi toqsannyń qorytyndysy boıynsha ınflıatsııa 1,9% kezinde 2,8 paıyz mólsherinde kiristilik alyndy. Investıtsııalyq qyzmet, sondaı-aq zeınetaqy aktıvterin naryqtyq jáne baǵamdyq qaıta baǵalaý nátıjesinde naqty kiristilik qamtamasyz etildi», - dedi UB basshysy Úkimet otyrysynda bıylǵy qańtar-naýryzda eldiń áleýmettik-ekonomıkalyq damý qarqynyn talqylaý kezinde.

Onyń aıtýynsha, bıylǵy 9 sáýirdegi jaǵdaı boıynsha 1 tlrn teńgeden asa somaǵa salymshylardyń zeınetaqy jınaqtaryn merziminen buryn alý boıynsha 210,8 myń ótinishi oryndaldy. Alynǵan jınaqtardyń 99,4 paıyzyn azamattar turǵyn úı máselelerin sheshýge jumsady», - dedi Dosaev.

Budan bólek, 4 basqarýshy kompanııanyń senimgerlik basqarýyna 2,5 mlrd teńgege zeınetaqy jınaqtary berildi.