Zeınetaqy jınaǵyn páter alýǵa berý jaqsy bastama –saıasattanýshy

NUR-SULTAN. QazAqparat - Azamattarǵa zeınetaqy qorlarynda jınaqtalǵan qarajattaryna páter satyp alýǵa múmkindik berý jaqsy bastama. Mundaı pikirdi saıasattanýshy Erlan Saırov bildirdi, dep habarlaıdy QazAqparat tilshisi.

«Elimizde áleýmettik máseleler óte kóp. Ony jasyrýdyń da jóni joq. Qazaq: «Aýrýyn jasyrǵan óledi» deıdi. Sol kóptegen kúrmeýi kóp áleýmettik máselelerdi sheshýdiń belgili bir retseptileri Joldaýda aıtyldy. Negizi ol retseptiler jetkilikti. Mysaly, zeınetaqy jınaqtaryn aıtsaq bolady. Onyń belgili bir bóligin páter alýǵa nemese balalaryn oqytýǵa jumsaý máselesi. Bul óte jaqsy bastama», - dedi Erlan Saırov Memleket basshysy Qasym-Jomart Toqaevtyń Qazaqstan halqyna Joldaýyna oraı pikir bildire kele.

Degenmen, ol zeınetaqy jınaqtaryn páter satyp alýǵa nemese balalaryn oqytýǵa alý máselesin áli de bolsa qoǵammen birge talqylaý qajettigin basa aıtty.

Esterińizge sala ketsek, Qasym-Jomart Toqaev Úkimetke azamattardyń zeınetaqy jınaqtaryn baspana alýǵa jumsaýyn retteýdi tapsyrǵan edi.

«Úkimetke jyl sońyna deıin jumystaǵy azamattardyń zeınetaqy jınaqtaryn maqsatty paıdalaný máselesin pysyqtaýdy tapsyramyn. Mysaly, baspana satyp alý úshin nemese bilim alý úshin. Shyǵyndardy azaıtyp, aktıvterdi ınvestıtsııalyq basqarýdyń sapasyn jaqsartý úshin Úkimetke bıýdjettik júıeni shoǵyrlandyrý máselesin zerdeleý, áleýmettik qamtamasyz etýde biryńǵaı áleýmettik qor men biryńǵaı áleýmettik tólem engizý júkteledi», - degen edi Qazaqstan Prezıdenti.