Zeınetaqy tólemderindegi ózgerister týraly aqparat ras pa - Eńbekmın jaýap berdi
Belgisiz bireýler messendjerler men áleýmettik jelilerde vedomstvoaralyq komıssııa eńbek ótiline qaraı bazalyq zeınetaqy tóleminiń ornyna 39 myńnan 45 myń teńgege deıin zeınetaqyǵa qosymsha tóleýdi engizý týraly zań jobasyn ázirledi degen jalǵan aqparat taratyp jatyr.
QR Eńbek jáne halyqty áleýmettik qorǵaý mınıstrligi Qazaqstanda zeınetaqy tólemderi mynadaı úsh quramdas bólikten qalyptasady dep habarlaıdy: bazalyq, birlesken jáne jınaqtaýshy bólik.
Bazalyq zeınetaqy zeınetkerlik jasqa jetken barlyq azamattarǵa taǵaıyndalady. Onyń mólsherin aıqyndaý kezinde zeınetkerlik jasqa jetken kúngi barlyq eńbek ótili eskeriledi. 10 jyl jáne odan az ótili úshin bazalyq zeınetaqynyń eń tómengi mólsheri eń tómengi kúnkóris deńgeıiniń 65 paıyzyn nemese 28 215 teńgeni quraıdy. Al eń joǵary mólsheri bıylǵy jyly eń tómengi kúnkóris deńgeıiniń 105 paıyzyn nemese 45 578 teńgeni quraıdy. Eń tómengi kúnkóris deńgeıiniń jyl saıynǵy ósýimen bazalyq zeınetaqy mólsheri artady.
Jasyna baılanysty zeınetaqy nemese ony yntymaqty zeınetaqy dep ataıdy, 1998 jyldyń 1 qańtaryna deıin keminde alty aı eńbek ótili bar azamattar alady. Onyń mólsheri osy kezeńge deıingi jumys ótiline jáne ortasha aılyq tabysqa baılanysty. Jyl saıyn yntymaqty zeınetaqy mólsheri ınflıatsııa deńgeıinen eki paıyzǵa ozyp ındeksteledi.
Jınaqtaýshy zeınetaqy mindetti zeınetaqy jarnalaryn, mindetti kásiptik zeınetaqy jarnalaryn jáne erikti zeınetaqy jarnalaryn tóleý arqyly jınaqtaýshy zeınetaqy júıesine qatysatyn adamdarǵa tólenedi. Jınaqtaýshy zeınetaqynyń mólsheri júıege qatysý kezeńine jáne zeınetaqy jınaqtarynyń kólemine baılanysty. Ol neǵurlym kóp jınalsa, zeınetaqy mólsheri soǵurlym joǵary bolady.
Azamattardan tek resmı kózderdegi aqparatty paıdalanýyn suraımyz.