Zeınet jasyna taqaǵan adamdardy jumysqa ornalastyrý úshin «kúmis jas» jobasy iske asyrylady
Mınıstrdiń atap ótýinshe, Kásipkerlikti damytý jónindegi ulttyq joba kásipkerlik belsendilikti arttyrýǵa, kásipkerlerdiń ósýin jedeldetýge jáne jańa taýashalardy qurýǵa, sondaı-aq básekelestikti keshendi damytýǵa baǵyttalǵan. Bul baǵytty iske asyrý aıasynda 10 tapsyrma, 30 kórsetkish pen 69 is-shara kózdelgen.
«Ulttyq jobany qarjylandyrýdyń jalpy kólemi shamamen 8,5 trln teńge, onyń ishinde, respýblıkalyq bıýdjetten 1 trln teńgeden asa, jergilikti bıýdjetten 125 mlrd teńge qarjy qarastyrylǵan. Sonymen qatar, 7,3 trln teńge somasyna jeke ınvestıtsııa tartý qamtamasyz etiledi», - dedi ol.
Onyń atap ótýinshe, ulttyq jobanyń «Kásipkerlik belsendilikti arttyrý» baǵyty aýqymynda kásipkerlik qurylymynda sapaly ózgeristerdi qamtamasyz etý kózdeledi. Óz isin ashý úshin, onyń ishinde «Bastaý Bıznes» jobasy aıasynda jaǵdaı jasaý boıynsha is-sharalar qabyldanady. Іskerlik baılanystardy keńeıtý maqsatynda sheteldik bıznes-taǵylymdamalar uıymdastyrý kózdeledi.
«Sonymen birge, jumyssyzdardy qamtý maqsatynda «Túlekterge arnalǵan jastar praktıkasy», «Áleýmettik osal toptarǵa arnalǵan áleýmettik jumys oryndary» sııaqty jobalar, sondaı-aq zeınetkerlik jas aldyndaǵy adamdardy jumysqa ornalastyrý úshin «kúmis jas» jobasy iske asyrylady. Barlyq is-sharalardy qabyldaý nátıjesinde jeke isin ashqan adamdardyń úlesi 1,7 esege artady. Sýbsıdııalanatyn jumys oryndarynan keıin turaqty jumys oryndaryna jumysqa ornalastyrylǵan adamdardyń úlesi 1,4 ese ósedi. Qarjylyq emes qoldaý is-sharalaryn alǵan kásipkerlik sýbektileriniń sany 638 myń birlikke jetedi. Qysqa merzimdi kásiptik oqýdan keıin jumysqa ornalastyrý deńgeıi 55-ten 80 paıyzǵa deıin artady», - dedi Áset Erǵalıev.