Zertteý úshin Úkimet sırek kezdesetin 96 janýardyń 480 danasyn tabıǵı ortadan jınaýǵa ruqsat bermek
00:15, 26 Maýsym 2023
ASTANA. QazAqparat – Qyzyl kitapty ázirleý úshin zertteý júrgizýge sırek kezdesetin omyrtqasyz 96 janýardyń 480 danasyn tabıǵı ortadan jınaýǵa ruqsat berilmek, dep habarlaıdy QazAqparat tilshisi.
«Zoologııa ınstıtýty» RMK-ǵa 2023-2024 jyldardaǵy «Qyzyl kitapty ázirleý jáne sırek kezdesetin jáne joıylyp bara jatqan túrleri úshin elektrondyq bazasyn» jasaý maqsatynda omyrtqasyz janýarlardyń genetıkalyq, taksanomııalyq ártúrliligin zerdeleý jáne sırek kezdesetin jáne joıylyp bara jatqan túrlerin saqtaý maqsatynda krıobıologııalyq, molekýlalyq-genetıkalyq jáne morfologııalyq zertteýler júrgizý úshin omyrtqasyz janýarlardyń 96 sırek kezdesetin jáne joıylyp bara jatqan túrinen 480 danasyn tabıǵı ortadan jınaýǵa ruqsat berilsin», - delingen Ashyq NQA portalynda jarııalanǵan Úkimet qaýlysynyń jobasynda.
Qujat 10 shildege deıin kópshilik talqylaýda bolady. Keıin qol qoıý úshin Premer-Mınıstrge joldanady.