Zertteý: Deldaldar - jemqorlyqqa jol ashatyn negizgi fıgýrant

NUR-SULTAN. QazAqparat – Qazaqstanda jemqorlyq qaýpin týyndatatyn negizgi fıgýranttar – deldaldar bolyp otyr. Arnaıy zertteýge, saýalnamaǵa qatysqan respondentter deldaldardyń kóbeıýýin – qajetti kommýnıkatsııanyń azdyǵymen baılanystyrady. Bul týraly tolyǵyraq «Transparency Kazakhstan» QQ atqarýshy dırektory Olga Shııan Ortalyq kommýnıkatsııalar qyzmetinde ótken brıfıngte aıtyp berdi, dep habarlaıdy QazAqparat tilshisi.

«Deldaldardyń kóbin ádette vedomstvonyń nemese memlekettik organdardyń qyzmetkerleri quraıtyn. Keıin olardyń qataryna qarapaıym azamattardyń ózderi de enip, deldaldardyń sany arta tústi. Deldaldardyń kóbeıýýin respondentter qajetti kommýnıkatsııanyń azdyǵymen baılanystyrady. Sondyqtan «kómekshiler», ıaǵnı deldaldar suranysqa ıe bola bastaǵan», - dedi spıker.

Olga Shııan sonymen qatar qandaı laýazymdaǵy qyzmetkerler beıresmı jaǵdaıdy máselelerdiń sheshilýine kóbirek aralasqanyn atap ótti.

«Kóbinde olar mamandar jáne qarapaıym qyzmetkerler boldy. Sondaı-aq basshylardyń orynbasarlarynyń úlesi 17%-dy quraıdy. Jemqorlyqqa ıtermelegen kelisssózderge ne sebep boldy? Respondentter 30-dan astam sebepti ataǵan. Olardyń jartysynan kóbi «solaı yńǵaıly» nemese «másele solaı tez sheshiledi» dep jaýap bergen. 8%-dan astamy «basqa jol joq» degen. Osylaısha, respondentter óz máselesin jedeldete sheshý úshin, ıaǵnı qyzmet nemese paıda alý úshin beıresmı túrde qosymsha kelisimder jasaýǵa daıyn ekenin túsindirdi», - dep qosty Olga Shııan.