Zergerler qosymsha qun salyǵynan ýaqytsha bosatylady

ASTANA. QazAqparat – QR Premer-Mınıstri Álıhan Smaıylov Senat depýtattarynyń saýalyna joldaǵan jaýabyna súıensek, 2023 jyldan bastap zergerler altyn men kúmis ótkizýdiń qosymsha qun salyǵynan ýaqytsha bosatylady, dep habarlaıdy QazAqparat tilshisi.

«Salyq kodeksine 2023 jyly otandyq zergerlerdi altyn men kúmisti ótkizýden túsetin qosymsha qun salyǵynan bosatý bóliginde tolyqtyrýlar engizildi. Oń nátıje bolǵan jaǵdaıda normanyń qoldanylý merzimi uzartylady. Zergerlik buıymdardy óndirýshilerge baǵaly metaldardy satý tártibin tikeleı shart negizinde nemese taýar-shıkizat bırjasy arqyly qunynan 15% aldyn ala tólemmen jáne tólemdi 180 kúnge keıinge qaldyrý shartymen engizý máselesi qosymsha pysyqtalýda», - dep jazylǵan jaýapta.

Onyń málimeti boıynsha, lombardtardyń zergerlik buıymdardy, ásirese qoldanylǵan jáne saýda-sattyqtan keıin ótkizilmegen buıymdardy eksporttaýyn boldyrmaý úshin «Baǵaly metaldar men asyl tastar týraly» Zańǵa túzetý engizý josparlanǵan. Naqtyraq aıtsaq, ishki naryqta ótkizilmegen baǵaly metaldardyń affınajdalǵan altyn quımalaryn Ulttyq Banktiń aktıvterine esepke jatqyzylýy múmkin.

«Kepilge salynǵan múlikti ótkizý (satý) is júrgizý zańdarynda belgilengen tártip boıynsha jarııa saýdaǵa salyp satý arqyly júrgiziledi (Azamattyq kodekstiń 319-babynyń 1-tarmaǵy). Zergerlik buıymdar tolyq ótkizilmegen jaǵdaıda lombardtar olardy qoldanylǵan qaıtalama shıkizat retinde «Taý-Ken Altyn» JShS affınaj zaýytyna ótkizýi qajet», - dep túsindredi Álıhan Smaıylov.