Zerendide qatty jel turyp, 8 turǵyn úıdiń shatyry ushyp ketti

NUR-SULTAN. QazAqparat - Búgin Aqmola oblysy Zerendi aýdanynyń Aqadyr aýylynda qatty jel turyp, 8 úıdiń shatyryn ushyryp áketti, dep habarlaıdy QazAqparat oblystyq TJD baspasóz qyzmetine silteme jasap.

«Zerendi aýdanynyń Aqadyr aýylynda ekpini 23 m/s deıingi qatty jel saldarynan jalpy aýdany 300 sharshy metr bolatyn 8 jeke turǵyn úıdiń shatyrlary ishinara buzyldy», - dep habarlady Aqmola oblysy TJD baspasóz qyzmetinen.

Aqadyr, Uıaly, Eńbek-Birlik aýyldarynda elektr berý jelileri úzilip, 247 abonentti elektrmen jabdyqtaý toqtatyldy. Oqıǵa ornynda «Qýat energopartner» JShS brıgadasy, 1 tehnıka jáne 5 adam jumyldyryldy. Adamdar aman.

«Qazirgi ýaqytta eldi mekenderde elektrmen jabdyqtaýdy qalpyna keltirý jumystary júrgizilip jatyr. Jergilikti atqarýshy organdardyń arnaıy komıssııasy jelden zardap shekken jeke turǵyn úılerdiń ıelerine keltirilgen zalaldy óteý boıynsha sheshim qabyldaıdy», – dep atap ótti oblystyq TJD bastyǵynyń orynbasary Qaırat Qasym.

Aqmola oblysynyń Tótenshe jaǵdaılar departamenti oblys turǵyndary men qonaqtaryna daýyl kezinde kelesideı tártip erejelerin saqtaý qajettigin eskertedi:

- Úıge qulap ketpes úshin qýraǵan aǵashtardy jáne aǵash butaqtaryn aldyn ala kesip tastańyz;

- Barlyq qurylystardy, ásirese ýaqytsha úılerdi jerge myqtap bekitińiz;

- Daýyl kesirinen otbasy músheleri ár túrli jerlerde qalyp qalsa nemese úıi qırap qalsa, búkil otbasy úshin kezdesý ornyn belgileńiz;

- Eger úıde bolsańyz, tereze áınekterin kóldeneń nemese juldyz tárizdi bekitilgen jabysqaq taspamen kúsheıtińiz. Jel nemese sý alyp ketýi múmkin barlyq zattar men jıhazdardy úıge kirgizińiz, maldy qaýipsiz jerge aıdap, sol jerge jem men sý qaldyryńyz.