«Zerde» holdıngi tóńiregindegi daý: Ábdirasylov sotta jeńildi

ASTANA. QazAqparat – «Zerde» ulttyq aqparattyq-kommýnıkatsııalyq holdıngi» aktsıonerlik qoǵamynyń basqarma tóraǵasy bolǵan Arman Ábdrasylov holdıngti taratý jáne óziniń jumystan shyǵarylýyna qatysty sheshimmen kelispeı Astananyń ekonomıkalyq sotyna júgindi. Alaıda, sot onyń aryzyn qanaǵattandyrmady, dep habarlaıdy QazAqparat tilshisi.

Taratylǵan málimetke qaraǵanda, A.Ábdrasylov elordanyń ekonomıkalyq sotyna taratý komıssııasynyń holdıngke qatysy 2022 jyldyń 11 tamyzy men 7 qyrkúıektegi sheshimderin jaramsyz dep taný týraly shaǵym túsirgen. Talapker shaǵymynda taratý komıssııasy taratý qyzmeti bóliginde ǵana sheshim qabyldaýǵa quqyly ekendigin, al Dırektorlar keńesiniń ókilettigin toqtatý jáne jańa keńes saılaý onyń quzyretine kirmeıtinin atap ótken.

Osyǵan oraı Astana qalasynyń ekonomıkalyq soty mynadaı mán-jaıdy anyqtaǵan:

2022 jyldyń 5 tamyzyndaǵy QR Úkimet qaýlysymen jáne 8 tamyzdaǵy QR Tsıfrlyq damý, ınnovatsııalar jáne aeroǵarysh ónerkásibi mınıstri mindetin atqarýshynyń buıryǵymen «Zerde» holdıngin taratý komıssııasy qurylǵan.

8 tamyzda holdıngtiń Dırektorlar keńesi enshiles kásiporyndardyń basshylaryn tártiptik jazaǵa tartý, basqarma músheleriniń ókilettigin merzimin buryn toqtatý, basqarma múshelerin saılaý týraly sheshim qabyldaǵan.

11 tamyzda taratý komıssııasy 8 tamyzda qabyldanǵan atalǵan sheshimniń kúshin joıyp, «UAT» AQ, «QazInnovations» Ulttyq ınnovatsııalardy damytý agenttigi» AQ Dırektorlar keńesiniń, «Astana Hub» ІT-startaptar halyqaralyq tehnoparki» qamqorshylyq keńesiniń ókilettigin merziminen buryn toqtatqan.

Sonymen qatar taratý komıssııasynyń 2022 jyldyń 7 qyrkúıegindegi №12 hattamasymen Dırektorlar keńesi quramyn anyqtaý, Dırektorlar keńesin saılaý týraly sheshim shyǵarǵan.

Al 2022 jyldyń 1 qyrkúıeginde Tsıfrlyq damý mınıstriniń buıryǵymen A.Ábdrasylovpen aradaǵy eńbek qatynasy toqtatylǵan.

«Sot talapkerdiń talabyn qanaǵattandyrýdan bas tartý týraly sheshim shyǵardy. Óıtkeni, 2022 jyldyń 8 tamyzynda jalǵyz aktsıoner/quryltaı ókilettigi «Zerde» holdıngi» AQ-ny taratý komıssııasyna berildi. Osyǵan baılanysty qabyldanǵan sheshim tolyqtaı zańdy áli negizdi sanalady. Buǵan qosa, qabyldanǵan sheshimder A.Ábdrasylovtyń quqyǵyn buzbaǵan. Sebebi onymen eńbek qatynasy úzilgen. Sheshim zańdy kúshine engen joq», - dep atap ótedi sottan.