Zaısanda maldyń jappaı qyrylýy shyndyqqa janaspaıdy - Respýblıkalyq komıssııa

ÓSKEMEN. QazAqparat - Sońǵy ýaqytta buqaralyq aqparat quraldarynda Zaısan aýdany, Shilikti aýyldyq okrýginde belgisiz indetten mal qyrylyp jatyr degen aqparat taǵy da jarııalana bastady, dep habarlaıdy ShQO ákiminiń baspasóz qyzmeti.

Qoǵamdy dúrliktirgen bul jaıtty tekserý maqsatynda 27-28 maýsymda QR AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy Baýyrjan Abyzbaevtyń tóraǵalyǵymen, oblystyń veterınarlyq qyzmeti, aýdan ákimdigi men mal ıeleriniń qatysýymen Respýblıkalyq komıssııa jumys istedi.

Atalmysh Respýblıkalyq komıssııa maldyń «juqpaly aýrýlardan jappaı qyrylý» faktisiniń joqtyǵyn taǵy da rastady.

Esterińizge salsaq, osyǵan deıin mamyr aıynyń ortasynda Shilikti aýylynda tekserý júrgizilip, 25 maýsymda QR Aýyl sharýashylyǵy mınıstrligi bul aqparattardy teriske shyǵarǵan bolatyn. Shyǵys Qazaqstan oblysynda asa qaýipti aýrýdan mal qyrylyp jatyr degen aqparat jalǵan jáne ondaı derek múlde tirkelmegen.