Zaısanda kópbalaly otbasylarǵa berilgen úılerdiń tóbesinen sý aǵyp tur

ÓSKEMEN. QazAqparat – Shyǵys Qazaqstan oblysy Zaısan qalasynda kópbalaly otbasylar ózderine berilgen úılerdiń sapasyzdyǵyna shaǵymdanýda. Olardyń aıtýynsha, úıdiń tóbesinen sý aǵyp, qabyrǵalary kógerip ketken. Al aýdan ákimdigi jańa úılerdiń kem-ketigin jóndetý úshin merdigerlerge qatysty sotqa talap aryz joldanǵanyn málim etti, dep habarlaıdy QazAqparat tilshisi.

Bes balanyń anasy Saǵynysh Soltanbekqyzynyń otbasy «Birqabatty Shyǵys» baǵdarlamasymen salynǵan bul úıge 2021 jyldyń jeltoqsan aıynda kirgen. Onyń aıtýynsha, áýelde úıdiń eshqandaı mini joqtaı kórindi. Alaıda ýaqyt ótken saıyn túrli kemshilikter biline bastaǵan.

«Іshi-syrty jyltyraǵan bul úıge kirgende máz boldyq. Biraq qýanyshymyz uzaqqa sozylmady. Aqyryndap qabyrǵalary kógere bastady. Sodan soń aqpan aıynda kún jylynǵanda tóbeden sý aqty. Kireberistegi lıýstra bekitilgen jerden sý sorǵalady. Qaıta-qaıta sýdy tegeshke toltyryp, tasyp júrýge májbúr boldyq. Úıdiń tóbesi tym juqa salynǵan. Jeldiń gýili de estiledi», - deıdi ol.

Kópbalaly ana tóbeden sý aǵyp jatqanyn vıdeoǵa túsirip, úıdi salǵan merdiger kompanııanyń qyzmetkerlerine jibergen. Olar úıge kelip, sý aqqan jerge pena quıǵan. Alaıda osymen másele sheshilmedi.

«Qaıtadan sý aqqanda merdigerge qońyraý shalyp edim, «Kún jylynǵanda jóndep beremiz» dedi. Sóıtip, kún de jylyndy. Sol kezde «Ózińiz jóndeıtin adam taýyp, baǵasyn kelisińiz. Shyǵyndy tolyqtaı ózimiz kóteremiz» dedi. Kóp uzamaı qurylyspen aınalysatyn azamattardy taýyp, 200 myńǵa kelistim. Alaıda merdiger kompanııa sózinde turmaı, aqshany bermedi. Jazdyń ortasynda ekinshi jerden sý aqty. Dál elektr toǵynyń tusynan. Sonyń saldarynan sý aqqanda toq jarqyldap ketedi. Úıde balalar bolǵandyqtan qorqamyz», - deıdi Saǵynysh Soltanbekqyzy.

Áli kúnge deıin jańbyr jaýǵan saıyn tegeshpen sý shyǵaryp áýre-sarsańǵa túsip júrgenin aıtqan áıel merdiger kompanııanyń qyzmetkerleri qazir múlde telefondaryn almaıtynyna shaǵymdandy.

«3 bólmeli bul úı bizge jalǵa berilgen. Aı saıyn 17 500 teńge páter aqysyn tóleımiz. Tek bizdiń emes, taǵy 5 úıdiń tóbesinen sý aǵady. Úkimettiń kópbalaly otbasylardy qoldap jatqanyna rızamyz. Biraq úı sapaly bolýy kerek qoı. Eger úndemeı otyra bersek, jaýapsyzdyq odan saıyn kúsheıip, basqa otbasylarǵa budan da nashar úıler berilýi múmkin», - deıdi kópbalaly ana.

Osyndaı taǵy bir úıdiń turǵyny Ásem Kýderınovanyń aıtýynsha, úılerdiń qurylysy durys aıaqtalmaǵan. Kóktemde erigen qar sýy úıdiń tóbesinen sorǵalap, mazasyn qashyrǵan.

«Merdigerge shaǵymymyzdy talaı aıttyq. Biraq áli kúnge deıin nátıje joq. Úıdiń tóbesi tym juqa. Іshi dymqyldanyp, jańadan satyp alǵan jıhazdarym túgeldeı kógerip ketti. Tipti esik-terezeleri de durys jabylmaıdy», - deıdi ol.

Turǵyndar jaryq baǵanalary ornatylǵanymen áli kúnge deıin shamdardyń janbaıtynyn da tilge tıek etti. Kún batqanda oqýshylar mektepten qorqyp qaıtady eken.

Zaısan aýdany ákimdiginiń málimetinshe, úılerdiń sapasyna tekserý júrgizilgen. «Birqabatty Shyǵys» baǵdarlamasymen barlyǵy ekipáterli 31 jer úı salynǵan.

«Bul úıler jeke ınvestorlar esebinen salynyp, aýdandyq turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminiń teńgerimine satyp alynǵan. Qospáterli turǵyn úıler kezekte turǵan kópbalaly analarǵa 2021 jyldyń jeltoqsan aıynda jalǵa berilgen. Úılerde anyqtalǵan kemshilikter boıynsha merdigerler «Kelgenbaev Tımýr» JK , «Ajyqanov Aıdyn» JK qatysty Shyǵys Qazaqstan oblysynyń mamandandyrylǵan aýmaqtyq ekonomıkalyq sotyna talap-aryz joldandy», - delingen resmı habarlamada.