Zarema Shaýkenova: Táýelsizdiktiń 30 jyldyǵy – elimizdiń odan ári damý jolyn kórsetý múmkindigi

NUR-SULTAN. QazAqparat - Búgin Qazaqstan Respýblıkasy Táýelsizdiginiń 30 jyldyǵyn merekeleýge daıyndyq jónindegi memlekettik komıssııanyń birinshi otyrysynda Prezıdent Qasym-Jomart Toqaev el ómirindegi aıtýly oqıǵa – Táýelsizdik kúnin merekeleýdiń asa mańyzdy kezeńge sáıkes kelip otyrǵandyǵyna basa toqtaldy.Memleket basshysynyń aıtýynsha, mereıtoılyq data el ómirindegi kezekti meje emes, al bul qorytyndy jasaý, qarapaıym aqıqatty eske alý jáne memleketimizdiń odan ári damý jolyn kórsetý múmkindigi, deıdi QR UǴA akademıgi, QSZI dırektory Zarema Shaýkenova.

«Shynynda da, ótkenge kóz júgirtsek, Táýelsizdik jyldary ishinde Qazaqstan ekonomıkalyq ósý, saıası turaqtylyq pen áleýmettik ál-aýqat jolynda úlken kúsh-jiger kórsetti dep senimmen aıtýǵa bolady. Óziniń modernızatsııalaý jolyn ótken ǵasyrdyń sońynda, turlaýsyzdyq pen týrbýlenttilik kezeńinde bastaǵan Qazaqstan Tuńǵysh Prezıdent – Elbasy N.Á. Nazarbaevtyń basshylyǵymen memlekettiń qazirgi áleýmettik saıasatynyń negizi bolyp tabylatyn ekonomıkalyq ósýdiń joǵary kórsetkishterine qol jetkize aldy».

Sondaı-aq ǵalymnyń pikirinshe, halyqtyń ál-aýqatyn arttyrý jónindegi dáıekti saıasatty jalǵastyra otyryp, Q.K. Toqaev óz sózinde bolashaq Táýelsiz Qazaqstannyń arhıtektýrasyn quraıtyn eldi odan ári damytýdyń birneshe basym baǵyttaryn atap ótti.

Birinshi kezekte, Qazaqstan halyqty áleýmettik qoldaýdy qamtamasyz etý jónindegi uzaq merzimdi basymdyqtarda qalyptastyrylǵan áleýmettik saıasattyń jańa qaǵıdattaryn jetildirý jolymen júretinin atap ótý qajet. Buǵan zeınetaqymen qamsyzdandyrýdyń, áleýmettik kepildikterdi keńeıtýdiń, jumys oryndaryn qurýdyń jáne t.b. jańa tásilderin jatqyzýǵa bolady.

Sonymen qatar, Qazaqstannyń odan ári damýynyń negizi – adamı kapıtal bolady, oǵan Q.K. Toqaev «Táýelsizdik qurdastary» Ulttyq jobasyn ázirleýdi jáne jalpy jastar saıasatyn iske asyrý tásilderin qaıta qaraýdy jarııa ete otyryp, erekshe nazar aýdardy. Jastar Qazaqstannyń búgini men bolashaǵynyń sheshýshi faktory bolyp tabylady, onyń ashyqtyǵy men beıimdelýi ózgerister men jańa jahandyq trendterge daıyn bolýǵa múmkindik beredi.

Memleket basshysy atap ótkendeı, ekologııalyq qaǵıdaty qazirgi zamanǵy qoǵamnyń mańyzdy postýlatyna aınalady, ol memlekettik saıasattyń bir bóligi ǵana emes, árbir qazaqstandyqtyń kúndelikti ómirine enýi tıis. Táýelsiz Qazaqstannyń jańa traektorııasy – bul ózine, qorshaǵan ortaǵa jáne týǵan jerdiń bastapqy tabıǵatyna uqypty qaraý. Dál osy ekologııalyq qundylyqtar bolashaq Qazaqstannyń otansúıgishtiginiń negizine aınalady.

«Árıne, tarıhsyz birde-bir memlekettiń, qoǵamnyń bolashaǵy joq. Táýelsizdik jyldarynda halqymyz elimizdiń áleýmettik ál-aýqaty men órkendeýiniń irgetasy retinde birlik pen kelisimdi saqtap, nyǵaıtty. Táýelsiz Qazaqstanǵa aparatyn joldyń ózi halqymyzdyń kópǵasyrlyq tarıhymen ushtasqan, ol jańa ýaqyt turǵysynan qaıta oılastyrý men qaıta baǵalaýdy talap etedi. Tıisinshe, Qazaqstan tarıhy jónindegi jańa akademııalyq basylym bizdiń elimiz tap bolyp otyrǵan ózekti máseleler men syn-tegeýrinderge sapaly zııatkerlik jaýap berýge shaqyrady.

Táýelsizdik – bul jańa jahandyq naqty ahýalda progressıvti damý jolymen júrýdi óz betinshe tańdaý múmkindigin qamtıtyn bizdiń basty qundylyǵymyz», dep túıindeıdi QSZI dırektory.