Zardap shekkenderdiń qaryzyn keıinge qaldyrýdyń 2 nusqasy usynylady – agenttik
«Qaryzdy keıinge qaldyrý úshin qaryz alýshy kez kelgen qoljetimdi baılanys tásilimen nemese kredıtorǵa jeke barý arqyly erkin formada ótinish jazýy qajet. Bul – 2022-2021 jyldardaǵy pandemııada qoldanylǵan keıinge shegerýdiń óte ıkemdi joly. Osy kezeńde keıinge shegerýdi 2,5 mln-nan astam azamat nemese jeke tulǵalar arasynda barlyq qaryz alýshylardyń 3,8%-y paıdalandy, keıinge qaldyrylǵan tólemder somasy 270 mlrd teńgeden asady. Barlyq zardap shekken qaryz alýshylarǵa ótinish jasaýǵa jetkilikti ýaqyt berý úshin ótinish úsh aı ishinde, ıaǵnı 2022 jylǵy 5 sáýirge deıin qabyldanady», - dedi A. Terentev Ortalyq kommýnıkatsııalar qyzmetinde ótken baspasóz máslıhatynda.
Bul rette, ótinish berilgen kúnge qaramastan, nesıeni keıinge shegerý TJ rejımi engizilgen kúnnen bastap beriledi.
«Biz tártipsizdikter kezinde eń kóp zardap shekken qaryz alýshylar úshin óz bıznesin qalpyna keltirýge uzaq ýaqyt qajet bolatynyn túsinemiz, sondyqtan nesıe berýshi men qaryz alýshynyń kelisimi boıynsha 3 aılyq keıinge shegerýdiń ornyna basqa uzaq merzimdi keıinge qaldyrý merzimi belgilenýi múmkin. Qazir qaryz alýshylar úshin keıinge shegerý merzimi aıaqtalǵannan keıingi nesıe óteý tártibi mańyzdy másele bolyp otyr. Qaryz alýshyǵa keıinge qaldyrylǵan tólemderdi óteýdiń eki balama tásilin tańdaý usynylady. Birinshisi – buryn keıinge shegerilgen tólemderdi qaryz merziminiń sońyna deıin birkelki bólý nemese nesıe boıynsha qazirgi tólemderdiń mólsherin saqtaý úshin qaryz merzimin ulǵaıtý. Kredıttik uıymnyń kelisimimen qaryz alýshyǵa ózge keste belgilenýi múmkin», - dedi spıker.
Agenttik ókili nesıe boıynsha keıinge shegerýmen baılanysty qaryz alýshylardyń quqyqtaryn qorǵaý boıynsha eki mańyzdy shartty atap ótti. Birinshisi – nesıe uıymdary qaryz alýshylardan nesıeni keıinge qaldyrýǵa baılanysty operatsııalardy júrgizý kezinde eshqandaı komıssııalar men basqa tólemderdi almaıdy. Ekinshisi – keıinge qaldyrý kezeńinde kredıtorlar qaryz alýshylar boıynsha jumys júrgize almaıdy, onyń ishinde olardy merzimi ótken bereshekti óteý qajettiligi týraly habardar ete almaıdy.