Zardap shekken órt sóndirýshilerge qatysty qyzmettik tergeý júrip jatyr – mınıstr

ASTANA. QazAqparat – Astanada qyzmet barysynda zardap shekken órt sóndirýshilerdiń jaǵdaıyna qatysty tergeý amaldary júrip jatyr. Bul týraly QR Tótenshe jaǵdaılar mınıstri ıÝrıı Ilın málim etti, dep habarlaıdy QazAqparat tilshisi.

«Keshe Astanada órt sóndirý kezinde zardap shekken qyzmetkerdiń jaǵdaıyna qatysty qyzmettik tergeý júrip jatyr. Qazir zardap shekken órt sóndirýshilerdiń biriniń jaǵdaıy aýyr. Ekinshisiniń jaǵdaıy turaqty, ómirine qaýip joq. Jaǵdaı bizdiń baqylaýymyzda. Óńirlerdegi jumys saparym aıaqtalǵan soń, zardap shekkenderdiń jaǵdaıyn jeke baryp biletin bolamyn. Sonymen qatar departament basshysyna aýyr háldegi qyzmetkerdiń otbasymen jumys isteý, qajet jaǵdaıda psıhologııalyq qoldaý kórsetý tapsyryldy. Árıne, qyzmetkerimiz saýyǵyp ketedi dep senemiz. Biz qazir Prezıdent ákimshiliginiń tapsyrmasyna sáıkes atalǵan qyzmetkerler memlekettik nagradaǵa usynyldy», - dedi ıÝrıı Ilın.

Aıta ketsek, elordada kópqabatty úıdegi órtten 3 adamdy qutqarǵan órt sóndirýshi aýrýhanada hal ústinde jatyr.

Sondaı-aq, Memleket basshysy Astanadaǵy kópqabatty úıde bolǵan órt kezinde erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.