Zara kompanııasy qazaqstandyq kásipkerdi sotqa berdi

<p>ASTANA. KAZINFORM &ndash; Zara jáne OYSHO saýda belgileriniń ıesi ónimderin zańsyz paıdalanǵany úshin qazaqstandyq kásipkerdi sotqa berdi. Kásipker óz býtıginde osy brendterdiń kıimderin satqan.</p>

QR Joǵarǵy soty baspasóz qyzmetiniń málimetine qaraǵanda, kásipker bul zattardy beıtanys satýshydan qolma-qol aqshaǵa tómen baǵada satyp alǵanyn moıyndady. Sodan keıin ol óz býtıginde ónimderdi satqan jáne ony ınternet arqyly jelide jarnamalaǵan.

Kásipker tanymal brendterdiń taýaryn satýǵa lıtsenzııa qajet ekenin bilmeıtinin aıtty. Kompanııanyń ókilderi men Ádilet departamentiniń qyzmetkerleri býtıkten taýar belgisimen zańsyz tańbalanǵan, ıaǵnı quny 2 mln teńgeden asatyn 117 taýardy tárkiledi.

Sot kásipkerdi taýar belgisi boıynsha talaptardy buzǵany úshin kináli dep tanyp, oǵan 2 mln teńgeden astam ótemaqy tóletýge mindettedi. Sondaı-aq oǵan áleýmettik jelilerdegi barlyq jarnamany alyp tastaýǵa nusqaý berildi, sebebi bul áreket te zań talaptaryn buzý dep tanylady.