Zar-zamannyń zulmaty ult jadynan umytylmaq emes

ASTANA. QazAqparat - HH ǵasyr basynda qazaq halqy óz tarıhyndaǵy asa aýyr qasiretke toly alapatty ashtyqty basynan keshti. Ult basyna túsken náýbetti qazaq «uly jut» dep atap ketkeni de ras. Qazaq halqy sanynyń teń jartysyna jýyǵyn jalmap ketken osynaý náýbet týraly talaı shyndyq aıtyldy, talaı-talaı sumdyqtar da arshyldy. Qoldan uıymdastyrylǵan asharshylyq bir jaqtan alǵanda, eldiń eńsesin kótertpesten, tuqyrtyp tuqymyn birjolata qurtý saıasaty odan saıyn ushtalyp, keıinnen qýǵyn-súrginge ulasty. Osynaý qazaqtyń basynda bolǵan qasiretke toly kezeńdi umytpaý, esten shyǵarmaý maqsatynda 31 mamyr - saıası qýǵyn-súrgin qurbandaryn eske alý kúni retinde atalyp keledi.

Asharshylyq qansha qazaqty jalmady?

1920 jyldary sol kezdegi bıliktiń solaqaı saıasatynan bastaý alyp, keıinnen qoldan uıymdastyrylǵan asharshylyq saldarynan bolǵan ekonomıkalyq, demografııalyq zardaptardyń Qazaq halqy úshin asa aýyr bolǵanyn dáleldep jatý artyqtaý. Tarıhshylar málimeti boıynsha, asharshylyq apaty Altaıdan Atyraýǵa deıingi aýmaqty tutastaı sharpyp, qazaq halqy jer betinen ult retinde joıylyp ketýdiń sál-aq aldynda qaldy. Jurt bosty, shetel aýdy. Qazir Atajurtyn ańsap júrgen sheteldegi qandastarymyzdyń basym bóligi sol jyldary taǵdyr taýqymetinen týǵan jerin tastap, jan saýǵalaǵandar hám solardyń urpaqtary. Al osynaý qoldan jasalǵan alapat qazaq ultynyń qanshamasyn opyryp ketti? Buǵan qatysty dálme dál, naqpa naq derekter áli de naqtylaýdy, arhıvter áli de arshýdy qajet etedi. Degenmen, zulmatty jyldarǵa kóz júgirtkender jaǵany ustatatyn derekterdi alǵa tartady. Aıtalyq, halyq jazýshysy, Májilis depýtaty Aldan Smaıyl zulmat jyldary 3 mln. 200-700 myńǵa deıingi aralyqta qazaq qyrylǵanyn aıtady. «Ótken ǵasyrdyń ár muraǵattan tóbe kórsetip qalatyn derekterine júginsek, asharshylyq aldymen Batys Qazaqstandy sharpyǵan. 1922 jyly Orynborda - 437776, Qostanaıda - 252816, Aqtóbede - 359326, Oralda - 277835, Bókeıde - 100 myń, Adaı ýezinde - 75 myń adam ashtan buratyldy. Batys Qazaqstandaǵy halyqtyń 31,4 paıyzy qyryldy. Eger osy ólkedegi bes gýbernııada sol tusta 2 mln. 653300 adam bolsa, onyń 800 myńǵa jýyǵy kóz jumǵan. Múrdeler ózen boıynda, aýyl aralarynda, eldi mekenderdiń kóshelerinde tarydaı shashylyp jatty. Bul jan túrshigetin qubyjyq kórinis edi», - deıdi depýtat A. Smaıyl. Onyń sózine qaraǵanda, 1917 jyly Qazaqstanda 5 mıllıon qazaq bolsa, onyń 1 mıllıon 500 myńy 1921-1922 jyldardaǵy ashtyqta qyrylǵan. Sonda tiri qalǵany - 3 mıllıon 500 myń. Al 1932 jylǵy ashtyqta alǵashqy zulmattan áýpirimmen saý qalǵan 3,5 mıllıon adamnyń teń jartysy apat bolǵany anyq. Endeshe 1939 jyly 1 mıllıon 750 myń qazaq qana jer basyp júrgen. «Tutastaı alǵanda, kóp derekterden saralasaq ár jyldardaǵy ashtyqta Qazaq halqy 3 mıllıon 250 myń adamnan aıyrylǵan. Janushyrǵan shyndyq osyndaı. Jantalastyrǵan jendet jyldardyń aqıqatynan aqylyń adasqandaı. Bizdiń osy esebimizdiń durys ekendigine shetel ǵalymdarynyń derekteri de dálel bola alady. Batys zertteýshisi R.Monvest 1931-1932 jyldardaǵy asharshylyqta 1 mıllıon, M.Olkott 1,5 mıllıonnan astam adam óldi deıdi. Osy jerde «Qazaqstan Ulttyq entsıklopedııasyndaǵy» ashtyq qurbandary týraly málimetterge de kóz salaıyq. Entsıklopedııada 1926, 1937 jyldardaǵy sanaqtarda olqylyqtar jiberilgendigi, sonyń saldarynan asharshylyqtaǵy adam shyǵynyn dál anyqtaýǵa kedergi keltirip, ár túrli pikirlerdiń óristeýine sebep bolǵany ádil eskertiledi. 1930-1933 jyldardaǵy ashtyq qurbandary 2 mln. 200 myń adamnan asyp tústi delinedi. Osy 2 mln. 200 myńǵa 1921-1922 jyldardaǵy zulmattyń 1 mln. 500 myń bozdaǵyn qossańyz, 3 mln. 700 myń bolyp shyǵady. Sonymen jyrtqysh jyldardyń adam shyǵyny - 3 mln. 200 myń nemese 3 mln. 700 myń. Keıbir tarıhshylar shetelderge aýdy dep esepteıtin 1 mıllıon adamdy osy kórsetkishke qossaq ta, odan ashtyqtyń qasireti azaımaıdy. Degenmen, buny sońǵy derek deýden aýlaqpyz», - deıdi A. Smaıyl.

Ultty joıý saıasaty ǵasyrlar boıy urpaq sanasynan óshpeıtin uly qasiret

Osynaý qasań jyldardaǵy qasiretti kezeńniń 1932 jyly sharyqtaý shegine jetkeni de shyndyq. Sondyqtan da, Elbasy N. Nazarbaev ult basyndaǵy qasiretti jyldardy esten shyǵarmaý qajettigin aıtyp, 31 mamyrdy ataýly kún retinde belgilegen. Shyndyǵynda, bul kún Qazaqstan úshin aıryqsha maǵynaǵa ıe. Qoldan uıymdastyrylǵan asharshylyqpen qosa, Keńestik solaqaı saıasattyń ashyqtan ashyq qurbanyna aınalǵandary qanshama. «Halyq jaýlaryn» anyqtaý boıynsha qatań saıasattyń saldarynan qýǵyn-súrginge ushyraǵandardyń ózderi ǵana emes, olardyń jaqyndary da zardap shekti. Qazaqstanda 103 myńnan astam adam qýǵyn-súrginge ushyrady, 25 myńnan astamy atý jazasyna kesildi. Olardyń arasynda qazaq zııalylary: ǵalymdar, mádenıet jáne saıasat salasynyń qaıratkerleri boldy. Keńestik bılik jergilikti turǵyndardyń ulttyq erekshelikteri men múddelerin qorǵaýshylarǵa, ulttyq avtonomııa qurý ıdeıasyn qoldaýshylarǵa «tap jaýlary», «ultshyldar», «jat pikirdegiler», «áleýmettik qaýipti elementter» degen jala jaýyp, halyqtyń da olarǵa degen teris kózqarastaryn qalyptastyrýǵa jaǵdaı jasady. Saıası qýǵyn-súrgin Qazaqstanda 1928 jyldyń ortasynan Alash qozǵalysy qatysqan qaıratkerlerdi tutqyndaýdan bastaldy. Olarǵa «býrjýazııashyl-ultshyl» degen aıyp taǵyldy. Olar ár túrli merzimge túrmege qamaldy, atý jazasyna kesildi, eriksiz jer aýdaryldy. Ult qaıratkerlerine negizinen KSRO-ny qulatý úshin jasyryn kontrrevolıýtsııalyq uıymdar qurdy degen zańsyz jala jabyldy. Sonymen qatar moldalar men dindarlardy «basqasha, bóten oılaıtyndar» dep aıyptady. Jalpy, tarıhı derekterge qaraǵanda, 1921-1954 jyldary aralyǵynda KSRO-da «kontrrevolıýtsııalyq» nemese «antısovettik» degen jalamen 3 mıllıon 777 myń adam sottalsa, olardyń 642-si atý jazasyna kesilgen eken.

Rasynda, «myń ólip-myń tirilgen» qazaq halqy talaı náýbetti bastan keship, amandyqta qalyp, máńgiligin dáleldedi. Ony dáleldeý jolynda da qanshama arystarymyz qurban boldy. Endeshe, ult úshin ómirin qıǵan, jazyqsyz japa shegip, aıypsyz atylǵan bozdaqtardyń rýhyna taǵzym etý bizdiń paryz. Memleket basshysy ózi­niń bir sózinde: «Repressııa jyldarynda aıaý­ly da abzal azamattarymyzdyń joıyl­ǵa­ny - bolshevızmniń betine basylar qa­ra tańba, bizdiń ǵasyrlar boıy umytyl­maı­tyn qasiretimiz» degen bolatyn. Son­dyq­tan da umytylmaıtyn qasiretimizdi ur­paq jadynda máńgige qaldyrý sharalaryn tereńdete túsýdiń mańyzy zor. Endeshe, asharshylyq pen qýǵyn-súrgin qurbandaryn eske alý kúni uly qyrǵynǵa ushyraǵan ultymyzdyń ulan­daryn eske túsirip, olardyń rýhy aldynda iltıfat bildirgenimiz abzal.