Zapastan shaqyrylǵan ofıtserlerdiń burynǵy jumys orny saqtalmaıdy

NUR-SULTAN. QazAqparat – Zapastan shaqyrylǵan ofıtserlerdiń burynǵy jumys orny saqtala ma? QR Qorǵanys mınıstrligi Kadrlar departamentiniń aǵa ofıtseri Berik Aınabekovke vedomstvonyń aqparat alańynda ótken onlaın brıfıngide osyndaı suraq qoıyldy, dep habarlaıdy QazAqparat tilshisi.

«Áskerı qyzmet jáne áskerı qyzmetshilerdiń mártebesi týraly» QR zańyna sáıkes zapastan shaqyrylǵan ofıtserlerge atqaryp jatqan laýazymdaryna sáıkes jalaqy tólenedi. Sondyqtan burynǵy jumys orny men jalaqysy saqtalmaıdy», - dep jaýap berdi Kadrlar departamentiniń aǵa ofıtseri.

Sondaı-aq ol zapastaǵy ofıtserlerdi shaqyrý tájirıbesi sovet zamanynan kele jatqan tásil ekenin eske saldy.

«Qarýly kúshter qataryna zapastan shaqyrý zańnamamyzda bar. Ol burynǵy Keńes úkimetinen kele jatqan tájirıbe. Shet memleketterde ondaı tájirıbe bar. Bizde de saqtalǵan. Munyń negizgi paıdasy óz erkimen qalǵan ofıtserler bizdiń Qarýly kúshterdi jasaqtaýǵa bir jaǵynan kómektesedi, bir jaǵynan oqyp, bilip, Qarýly kúshterdiń ári qaraı damýyna óz úlesterin qosady», - deıdi mınıstrlik ókili.

Berik Aınabekov zapastan shaqyrylǵan ofıtserler eki jyl merzim bitken soń Qarýly kúshter qatarynda qyzmetin jalǵastyra alatynyn atap ótti.

«Oǵan Qarýly kúshter qarsy bolmaıdy. Onyń biri ózimmin. Ásker qatarynda júrgenime on segiz jyl boldy. 2004 jyly úsh jylǵa shaqyrtylǵanmyn. Ol kezde zań boıynsha qyzmet merzimi úsh jyl bolǵan. 18 jyldyń ishinde tórt-bes garnızon ótip, qazir Qazaqstan Respýblıkasy Qarýly kúshteriniń ortalyq apparatynda qyzmet ótkerip otyrmyn», - dedi ol.

Eske salaıyq, B.Aınabekov sondaı-aq zapastan shaqyrylǵan ofıtserlerge qandaı áleýmettik qoldaýlar kórsetiletinin aıtqan bolatyn.