Zańsyz shyrsha satqandarǵa qansha aıyppul salynady

ASTANA. QazAqparat –15 jeltoqsannan bastap polıtseıler respýblıka aýmaǵynda zańsyz aǵash kesýdi anyqtaý jáne jolyn kesý sharalaryn bastady. Bul týraly QR Іshki ister mınıstrliginiń ókili Shuǵyla Turlybek aıtty, dep habarlaıdy QazAqparat tilshisi.

Baqylaýdy kúsheıtý maqsatynda avtojoldarda, sondaı-aq bazarlarda jáne basqa jerlerde 300-den astam mobıldi top qurylǵan.

«Jańa jyldyq merekeler qarsańynda polıtseıler tabıǵatty qorǵaý zańnamasynyń saqtalýyn baqylaýdy kúsheıtti. Eldi mekenderde qylqan japyraqty aǵashtardyń satylýyn baqylaý, olardy belgilenbegen jerde ótkizýge tyıym salý, sondaı-aq tıisti qujattarǵa tekserý júrgiziledi», - dedi Іshki ister mınıstrliginiń ókili aptalyq onlaın brıfıngide.

Onyń aıtýynsha, qylqan japyraqty aǵashty satýǵa ruqsat bolmasa, satýshy jasyl jelekti kútip ustaý jáne qorǵaý erejelerin buzǵany úshin ákimshilik jaýapkershilikke tartylýy múmkin.

Osy bap boıynsha: jeke tulǵalarǵa 15 AEK mólsherinde, shaǵyn kásipkerlik sýbektilerine nemese kommertsııalyq emes uıymdarǵa – 30 AEK, orta kásipkerlik sýbektilerine – 50 AEK, iri kásipkerlik sýbektilerine – 150 AEK mólsherinde aıyppul salynady nemese eskertýler jasalady.

«Orman kóshetterin zańsyz kesý anyqtalǵanda QR Qylmystyq kodeksinde bas bostandyǵynan aıyrý túrindegi eń joǵary jaza kózdeledi. Atalǵan aldyn alý sharasy jańa jyldyq merekelerge deıin jalǵasady», - deıdi Sh. Turlybek.