Zańsyz shyǵarylǵan aktıvterdi qaıtarý: Ashyqtyq úshin konsýltatıvtik-keńesshi organ qurylmaq

ASTANA. QazAqparat – Zańsyz shyǵarylǵan aktıvterdi qaıtarý rásimderiniń ashyqtyǵyn qamtamasyz etý úshin konsýltatıvtik-keńesshi organ qurý usynylady. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Prezıdenttiń 2022 jylǵy 26 qarashadaǵy №3 «Zańsyz shyǵarylǵan aktıvterdi memleketke qaıtarý jónindegi sharalar týraly» Jarlyǵyn (budan ári – Jarlyq) iske asyrý maqsatynda Úkimet Bas prokýratýramen jáne múddeli memlekettik organdarmen birlesip «Zańsyz satyp alynǵan aktıvterdi memleketke qaıtarý týraly» zań jobasyn ázirledi. Zań jobasynyń negizgi maqsaty Qazaqstan aýmaǵynda da, odan tys jerlerde de zańsyz satyp alynǵan aktıvterdi qaıtarý bolyp tabylady. Zańsyz shyǵarylǵan aktıvterdi qaıtarý rásimderiniń ashyqtyǵyn qamtamasyz etý úshin konsýltatıvtik-keńesshi organ qurý usynylady. Bul organnyń quziretine zańsyz satyp alynǵan jáne shyǵarylǵan aktıvterdi qaıtarý jónindegi usynymdardy ázirleý, sondaı-aq Bas prokýratýramen jyl saıynǵy atqarylǵan sharalar jáne qaıtarylǵan aktıvter boıynsha baıandama daıyndaý, jarııalaý jatatyn bolady», - dep atap ótedi Úkimet basshysy jaýabynda.

Onyń atap ótýinshe, múddeli memlekettik organdarmen birlesip aktıvterdi qaıtarýdy júzege asyratyn aktıvterdi qaıtarý jónindegi ýákiletti organ retinde Bas prokýratýrany aıqyndaý josparlanǵan.

«Osy maqsattar úshin zań jobasynda tıisti memlekettik, onyń ishinde quqyq qorǵaý organdarynyń fýnktsııalary aıqyndalǵan. sondaı-aq zańsyz shyǵarylǵan aktıvterdi ashý, shyǵý tegin rastaý jáne qaıtarý tetikteri reglamenttelgen. Zańnyń qoldanysyna jatatyn sýbektiler úshin ólshemsharttar ázirlengen», - dedi Álıhan Smaıylov.

Eske salaıyq, Úkimet basshysy sondaı-aq qaıtarylǵan aktıvterdi basqaratyn memlekettik qor qurý josparlanyp otyrǵanyn aıtqan bolatyn.