Zańsyz maınerlerdi tyısaq. Reseıden elektr ımporttamas edik - mınıstr

NUR-SULTAN. QazAqparat – QR Energetıka mınıstri Bolat Aqsholaqov zańsyz maınerlerdiń eldegi energetıka teńgerimine qalaı keri áser etip otyrǵanyn aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide BAQ ókilderi vedomstvo basshysyna Reseıden elektr ımporttaý qashanǵa deıin jalǵasatynyn surady.

«Bizde jalpy jylyna 14 mln kVt/saǵ energetıka tutynylady. Onyń kóbin ózimiz óndiremiz. Biraq tapshylyq bolǵan kezde Reseı Federatsııasynan qosymsha energııa alamyz. Jalpy qazirgi ýaqytta tańǵy jáne keshki ýaqyttarda tutynshýlyardyń kólemi ósedi. Sol sebepti osy ýaqytta 600-700MVt-qa deıin Reseı Federatsııasynan qýat alamyz», - dedi mınıstr.

Onyń aıtýynsha, Energetıka mınıstrligi usynyp otyrǵan jospar iske assa, reseıden elektr qýatyn ımporttaý 2026 jylǵa qaraı toqtaýy múmkin.

«Eger zańsyz qosylǵan maınerlerdi alyp tastasaq, ásirese, Reseıden elektr qýatyn almaýǵa da bolatyn edi negizi. Qazir biz sol baǵytta jumys istep jatyrmyz. Árıne, elektr generatsııasyn damytsaq, jospar boıynsha 2026 jylǵa deıin qosymsha stantsııany iske qossaq, bizge eshqandaı ımporttyń, ásirese Reseı Federatsııasynan alýdyń eshqandaı qajeti bolmaıdy», - dedi Bolat Aqsholaqov.