Zańsyz balyq aýlaýdan Qazaqstan bıýdjeti 40 mlrd teńgeden qaǵylyp otyr
«Ekonomıkada balyq sharýashylyǵy mańyzdy ról atqarady. Byltyr 45 myń tonna balyq aýlandy. Bul 2018 jylǵy deńgeıden 23 paıyzǵa joǵary. Salada 11 myń adam jumys isteıdi. Elimizde balyq ósirýmen 180 balyq sharýashylyǵy aınalysady. Onda 1 myńnan astam (1126) adam jumys isteıdi. Taýarlyq balyq ósirý kóleminiń ósimi baıqalady. Byltyr 6,9 myń tonna balyq ósirse, bul 2018 jylǵy deńgeıden 19 paıyzǵa joǵary. Osy jylǵa jospar – 7,8 myń tonna», - dedi Maǵzum Myrzaǵalıev búgin Ortalyq kommýnıkatsııalar qyzmetinde ótken halyqqa onlaın esep berý barysynda.
Mınıstr ótken jyly balyqty qaıta óńdeý nátıjesinde jalpy somasy 60 mln AQSh dollary bolatyn 30 myń tonna ónim eksporttalǵanyn, bul 2018 jylǵy deńgeıden 16,6 paıyzǵa artyq ekenin málim etti.
«Balyq salasyndaǵy ótkir problema – balyq ónimderiniń kóleńkeli aınalymy. Ol balyq óndirýdiń ortasha jyldyq kóleminen 5 ese artyq. Balyq aınalymynyń barlyq protsesin tsıfrlaý qajet. Balyq sharýashylyǵyn kóleńkeden shyǵarý salyq salý bazasyn 40 mlrd teńgege arttyrady. Kaspıı teńiziniń resýrstaryn ıgerý esebinen otandyq naryq kólemin 66-dan 120 myń tonnaǵa, balyq aýlaý 45-ten 60 myń tonnaǵa, al balyq ósirý 7-den 60 myń tonnaǵa deıin ulǵaıtýdyń joǵary áleýeti bar», - dedi ol.
Osyǵan baılanysty qazirgi ýaqytta mınıstrlik balyq salasyn uzaqmerzimdi damytý úshin ınvestıtsııalar tartýǵa jáne jumys oryndaryn qurýǵa yqpal etetin salany sýbsıdııalaý boıynsha birqatar zańnamalyq sharalardy pysyqtap jatyr.