Zańsyz aktıvti óz erkimen qaıtarǵandar nege qylmystyq jaýapqa tartylmaıdy – Májilis spıkeriniń jaýaby
«Memlekettegi eń ózekti bolyp turǵan másele – kezinde jymqyrylǵan deımiz be, zańsyz shyǵarylǵan deımiz be, sol kleptokrattyń shyǵarǵan qyrýar qarjysyn elge qaıtarý. Ol qandaı jolmen qaıtarylady? Osy másele osy zańda qarastyrylǵan. Bul jerde múmkin burynǵy standarttarǵa kelmeıtin tustar da bar shyǵar. Sebebi bul jaǵdaıdyń ózi de standartqa saı jaǵdaı emes, shynyn aıtsaq. Sondyqtan bul zań, birinshi kezekte, neni retteıdi? Bizdiń shetelge shyǵaryp ketken iri kleptokrattardyń qarjylaryn elge qaıtarýdy retteıdi. Birinshiden, osy zań boıynsha reestr qurylady. Sol reestrde ózińiz aıtqan azamattardyń tizimi jasalady. Ekinshiden, ol azamattar ol qarjyny óz erkimen qaıtaramyz deıtin bolsa, qylmystyq jaýapkershilikten bosatylady. Bizde búgin birinshi kezektegi másele – qarjyny qaıtarý», - dedi Erlan Qoshanov.
Palata spıkeriniń paıymynsha, mundaı shart Konstıtýtsııaǵa qaıshy emes.
«Bul – zańmen retteletin másele. Qarjyny qaıtarý degen de ońaı másele emes qoı. Eger biz jańaǵy ózińiz aıtqan qoldanystaǵy zańdar boıynsha, standartty joldarmen júretin bolsaq, óte uzaq ýaqyt alady. Ondaı aqshany shyǵarǵan adamdar baı adamdar ǵoı. Olar álemdik deńgeıdegi eń myqty advokattardy jaldaıdy, sottasady. Shet memleketterdiń aldynda solardyń zańdary boıynsha dáleldeýimiz kerek. Sondyqtan bul óte uzaq merzim alatyn protsess. Osy zań boıynsha tıisti komıssııa qurylady. Sol komıssııanyń jumysyna tek quqyq qorǵaý organdarynyń nemese memlekettik organdardyń birinshi basshylary ǵana emes, azamattyq qoǵamnyń da músheleri kiredi. Sonymen qatar, depýtattar kiredi. Bul da bir ashyqtyq dep esepteımin. Biz qandaı jolmen bolsa da, sol qarjyny qaıtarý úshin áreket jasap jatyrmyz. Bul zań el ıgiligi úshin jumys isteıtin zań bolady dep oılaımyn», - dedi Májilis tóraǵasy.