Zańsyz syıaqyny qorqytyp alý derekteri qatań baqylaýǵa alynady
Bul týraly Májilistiń jalpy otyrysynda sybaılas jemqorlyqqa qarsy is-qımyl máseleleri boıynsha zań jobasyn talqylaý kezinde QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov málim etti.
- Memlekettik organ, memlekettik jáne memlekettik emes uıym qyzmetkeriniń zańsyz syıaqyny qorqytyp alýyna baılanysty qylmystardy anyqtaý jónindegi jumysty jetildirý qarastyryldy. Túzetýler 2021 jylǵy 1 qyrkúıektegi Memleket basshysynyń Joldaýynda aıtylǵan turmystyq sybaılas jemqorlyqty joıý jónindegi tapsyrmasyn oryndaýǵa baǵyttalǵan. Tájirıbege súıensek, Halyqqa qyzmet kórsetý ortalyqtarynyń, aýrýhanalardyń, joǵary oqý oryndarynyń, bank qyzmetkerleriniń syıaqylardy bopsalaý derekteri jıi kezdesedi, - dedi U.Sarqulov.
Onyń aıtýynsha, 2023 jyly Sybaılas jemqorlyqqa qarsy qyzmettiń call-ortalyǵyna 27 myńnan astam qońyraý shalý deregi tirkeldi. Onyń ishinde 2 myńǵa jýyq qońyraý eGov máseleleri boıynsha jáne Halyqqa qyzmet kórsetý ortalyqtarynyń qyzmetkerlerine shaǵymdarǵa qatysty. 1,5 myń ótinish medıtsınalyq qyzmet kórsetý máseleleri boıynsha, 940 qońyraý bilim berý salasyndaǵy shaǵymdar. Atalǵan uıymdardyń qyzmetkerleriniń zańsyz syıaqy alǵany úshin qylmystyq jaýaptylyǵy Qylmystyq kodekstiń qoldanystaǵy 247-baby boıynsha týyndaıdy.
- Olar sheneýnikter bolmasa da, sáıkesinshe sybaılas jemqorlyq qylmystarynyń sýbektileri emes, biraq soǵan qaramastan, qoǵam aldynda bul el kólemindegi sybaılas jemqorlyq retinde qabyldanady. Búgingi kúni Qylmystyq kodekstiń 247-babynda kózdelgen qylmys ishki ister organdarynyń aıryqsha tergeýligi sanalady. Qylmystyq kodekstiń 247-baby boıynsha isti tıimdi tergep-tekserý úshin «para alý» boıynsha jedel-izdestirý qyzmetiniń barlyq arsenaly qoldanylýy tıis. Basqasha olardy anyqtaý qıyn, sondyqtan halyqta jazasyz qalý týraly pikir qalyptasady, - dedi agenttik ókili.
Osy oraıda zań jobasynda syıaqynyny qorqytyp alý belgileri bolǵan kezde arnaıy jedel is-sharalar ótkizýge múmkindik beretin túzetýler engizý kózdelgen.
- Sondaı-aq, Qylmystyq kodeks syıaqyny zańsyz bergeni úshin jaýapkershilikti kózdeıtin jańa 247-1-bappen tolyqtyrylyp otyr. Bul paraqorlyqqa uqsas, tek alýshylardy ǵana emes, syıaqyny berýshilerdi de jaýapqa tartýǵa múmkindik beredi. Qylmystyq kodekstiń 247-baby úshinshi bóligi (iri mólsherde nemese bopsalaýmen syıaqy alý) jáne 247-1-babynyń úshinshi bóligi boıynsha (iri mólsherde syıaqyny berý) Іshki ister mınıstrligimen qatar, Sybaılas jemqorlyqqa qarsy qyzmet úshin balamaly tergeýlik engiziledi, - dedi Ulan Sarqulov.
Budan buryn habarlanǵandaı, bul zań jobasy aıasynda aýyr jáne asa aýyr sybaılas jemqorlyq qylmystar jasaǵany úshin sottalǵandardyń jarııa tizilimi engiziledi.