Zańnamadan «baspasóz kartasyn» alyp tastaý usynyldy - Juldyz Súleımenova

<p>&laquo;Buqaralyq aqparat quraldary týraly&raquo; zań jobasyna 170 túzetý engizildi. Bul týraly Almatyda ótken XV &laquo;Media Quryltaı 2023&raquo; salalyq konferentsııasynda Májilis depýtaty Juldyz Súleımenova aıtty, dep habarlaıdy <a href="https://www.inform.kz/" target="_blank" rel="noopener">Kazinform.</a></p>

«Kóp bapqa túzetýler engizildi. Onyń ishinde jýrnalısterdi akkredıtteýdiń jeńildetilgen túri, baspasóz kartasyn alyp tastaýǵa baılanysty norma engizildi. Sondaı-aq BAQ-tyń memlkettik saıasattyń prıntsıpteri jáne olardyń baǵyttaryn naqtylaý normasy da bar. Memlekettik aqparattyq tapsyrystyń ashyqtyǵy men eseptiligine baılanysty normany atap ótken jón. Sonymen qatar BAQ-tyń taratylý retine baılanysty normalar qabyldandy. Jalpy sany 170 túzetý engizildi», - dedi spıker.

Atalǵan túzetýler Parlament Májilisinde talqylanyp, ary qaraı Senatqa joldanbaq. 

«Qazirgi tańda biz birinshi oqylymǵa daıyndalyp jatyrmyz. Oǵan deıin atalǵan normalar jumys tobynda talqylanady. Sheshim qabyldanǵan soń, birinshi oqylymǵa jiberilip, taǵy talqyǵa túsedi. Birinshi oqylymda búkil 98 depýtat daýystaryn beredi, keıin ekinshi oqylymda jiberiledi. Onda kontseptýaldy normalar qarastyrylady. Normalar birinshi jáne ekinshi oqylymda qabyldanǵan soń ǵana Senatqa joldanady», - dedi Juldyz Súleımenova. 

Ol sondaı-aq elimizde balalar basylymyn, atap aıtqanda, «Ulan» balalar gazetin damytý qajet ekenine toqtaldy. 

«Biz «Ulan» sekildi basylymdardy damytyp, balalardy oǵan jazdyrtyp, oqý-bilimge baýlyǵanymyz durys. Sondyqtan balalar gazetine jazylýdy sýbsıdııalaýymyz kerek. Sondaı-aq «Ulannyń» menshikti tilshileri bar, redaktsııasy bar, olardyń aılyq jalaqysyn ortasha aılyq jalaqydan kem bolmaýyn qamtamasyz etken jón», - dedi Májilis depýtaty. 

Onyń sózinshe, búginde gazet-jýrnaldardy shalǵaı aýdan, aýyldarǵa jetkizýde kúrmeýli másele kóp. 

«Búginde gazet, jýrnaldy shalǵaı aýdan, aýyldarǵa jetkizýde «ulttyq operator kim bolady» degen másele bar. Aıtý kerek, «Qazposhta» AQ ulttyq operator retinde anyqtalmaǵan. Osyǵan oraı búginde gazet, jýrnaldardyń shalǵaı eldimekenderge, 6 500 aýylǵa ýaqtyly jetýine baılanysty suraqtar týyndap otyr. Ol másele áli sheshimin tappady. Sol sebepti, aldaǵy ýaqytta «Qazposhtany» shaqyryp, Úkimetpen birlese otyryp, merzimdi basylymdy ýaqtyly jetkizýshi operatorǵa qatysty talqylaý ótkizemiz», - dedi Juldyz Súleımenova.