Zańnamada memlekettiń turaqty damýyn tejeıtin eshbir kedergi qalmaýǵa tıis – Prezıdent

NUR-SULTAN. QazAqparat – Parlament pen Úkimet Konstıtýtsııaǵa engizilgen ózgeristerge saı zańnamaǵa tıisti ózgertýler engizýi kerek. Bul týraly Prezıdent Qasym-Jomart Toqaev referendým qorytyndysyna qatysty Qazaqstan halqyna úndeýi barysynda málim etti, dep habarlaıdy QazAqparat tilshisi.

«Konstıtýtsııalyq reforma búkil quqyq salasyn jańǵyrtýǵa jol ashady. Parlament pen Úkimet Konstıtýtsııaǵa engizilgen ózgeristerge saı zańnamaǵa tıisti ózgertýler engizýi qajet. Qazaqstanda tıimdi quqyq qorǵaý jáne sot júıesin qurýǵa múmkindik beretin reformalar ázirlenýge tıis. Muny álemdik tájirıbeni eskere otyryp júzege asyrǵan jón», - dedi Qasym-Jomart Toqaev.

Osy oraıda Prezıdent qoǵamnyń jáne bıznes ókilderiniń óz quqyqtary men zańdy múddelerin qorǵaýǵa suranysy arta túskenin atap ótti.

«Elimizge azamattar men kásipkerlerdi barynsha qorǵaıtyn quqyq júıesi qajet. Zańnamada memleketimizdiń turaqty damýyn tejeıtin eshbir kedergi qalmaýǵa tıis. Zaman talabyna saı kelmeıtin jáne kúmán týǵyzatyn normalardyń bári kúshin joıýǵa tıis», - dedi Memleket basshysy.

Budan buryn habarlanǵandaı, Qasym-Jomart Toqaev memlekettik apparatty jańǵyrtyp, bıýrokratııadan barynsha aryltý úshin júıeli jumys jalǵasatynyn atap ótti.