Zańger BAQ týraly jańa zań ázirleýdi usynady
«Bizge BAQ týraly jańa zań ázirleý qajet degen usynys aıtqym keledi. Usynamyn. Qajet bolsa, tipti talap etemin. Bul túbegeıli jańa zań bolýy tıis. Sebebi, qazir BAQ pen jýrnalıster tsıfrlyq dáýir deıtin jańa sapalyq ólshemde jumys istep jatyr. Bul jaǵdaıda biz ınternettiń damýyn, ártúrli kózderden aqparat alý múmkindigin eskerýimiz kerek. Bul jaǵdaıda biz jýrnalıstiń quqyqtyq mártebesin, onyń quqyqtary men mindetterin, kásibı deńgeıdegi jaýapkershiligin aıqyndaýymyz kerek», - dedi Mereke Ǵabdýalıev buqaralyq medıany zańnamalyq retteý týraly konferentsııa aıasynda jýrnalısterge bergen suhbatynda.
Sondaı-aq, ol qazir jýrnalısterdi qýdalaýdyń túrli zańnamalyq tetikteri kóp ekenin atady.
«Men jýrnalısterdiń oıdan shyǵarylǵan negizder boıynsha qylmystyq qýdalaýǵa tartylýyna qarsymyn. Oqıǵa ornynan habar taratýǵa kelgen jýrnalıster polıtsııa bólimshesine jıi jetkiziletin bolyp júr. Onyń sońy keıde jumystan shyǵarýǵa deıin barady. Buǵan jol berilmeýi kerek», - dedi zańger.
Onyń aıtýynsha, BAQ týraly qoldanystaǵy zań quramdy normatıvterden quralǵan. Sondyqtan ony birtutas qujat etip qabyldaǵan jón.
«BAQ týraly zańǵa únemi ózgerister engizilip keledi. Qazir sonyń saldarynan ol quraq kórpege uqsap ketken. Biz buǵan basqasha qaraýymyz kerek. Biz búgin alǵan usynystardy shoǵyrlandyrý qajet. Biz bul máselege zańda qandaı baptardy aýystyrý kerek degen turǵydan emes, BAQ pen jýrnalısterdiń mártebesin aıqyndaý urǵysynan kelýimiz kerek. Osyǵan súıene otyryp, túbegeıli jańa zań ázirleý qajet», - dedi advokat.