Zańger áıeldiń ólimi: Almatyda sot úkiminiń kúshi joıyldy
Almaty qalalyq sotynyń apellıatsııalyq ınstantsııasy alqabılerdiń qatysýymen shyǵarylǵan úkimniń kúshin joıdy. Onda sottalýshy Nurtaevtiń áreketi qasaqana kisi óltirý (QK-niń 99-babynyń 1-bóligi) babynan asa joǵary psıhıkalyq tolqý jaǵdaıynda adam óltirý (QK-niń 101-baby) babyna aýystyrylǵan bolatyn.
«Apellıatsııalyq satydaǵy sot qylmystyq jáne is júrgizý zańnamasynyń normalarynyń saqtalýyn tekserip jatyr jáne osy negizde alqabılerdiń qatysýymen shyǵarylǵan úkimniń zańdylyǵyn, negizdiligin jáne ádildigin tekserýde. Protsessýaldyq normalardyń buzylýy isti sot qaraýyna qaıta joldaı otyryp, úkimniń kúshin joıýǵa negiz boldy», - delingen Almaty qalalyq sotynyń málimetinde.
Sondaı-aq búgin qorǵaýshy Johar Ótebekov apellıatsııalyq sotta jeńiske jetkenin málimdedi.
«Almaty qalalyq soty Aıman Asanovany óltirgen adamǵa qatysty jeńil jazanyń kúshin joıdy. Sot meniń aryzymmen tolyqtaı kelisti. Bizdiń fırma jumysty joǵary deńgeıde atqardy. Nurtaev tergeý ızolıatorynda qalady. Jaqynda ol bostandyqqa shyǵýy kerek edi (jaza merzimi aıaqtaldy). Aýdandyq sot isti qaıta qaraıdy. Sýdıa da basqa, Maıshınov emes. Qoldaýlaryńyzǵa kóp rahmet», – dep jazdy advokat.
Eske salaıyq, 42 jastaǵy áıelge shabýyl 2022 jyldyń 8 qazanynda saǵat 23:00 shamasynda qalanyń Almaly aýdanynda bolǵan edi. Kóptegen pyshaq jaraqattymen áıel jaqyn mańdaǵy aýrýhanaǵa jetkizildi. Alaıda ol 12 qazanǵa qaraǵan túni medıtsınalyq mekemede qaıtys boldy. Atalǵan derek QR QK-niń 99-baby boıynsha sotqa deıingi tergeýdiń biryńǵaı tizilimine tirkelgen bolatyn.
Almaty qalasynyń qylmystyq ister jónindegi mamandandyrylǵan aýdanaralyq soty atalǵan iske Nurtaevti kináli dep taýyp, ony 1,5 jylǵa bas bostandyǵynan aıyrý jazasyna kesken bolatyn.