Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda vedomstvoaralyq ózara is-qımyldy odan ári kúsheıtý men úılesimdi sharalar qabyldaýdyń mańyzy atap kórsetildi
Bul týraly QR Bas prokýratýrasynyń baspasóz qyzmeti habarlady.
Keńestiń jumysyna Úılestirý Keńesiniń músheleri, Prezıdent Ákimshiliginiń jaýapty qyzmetkerleri, Joǵarǵy Sottyń, Ekonomıkalyq qylmysqa jáne sybaılas jemqorlyqqa qarsy kúres agenttiginiń, Ulttyq qaýipsizdik komıtetiniń, Іshki ister mınıstrliginiń, Kedendik baqylaý komıtetiniń basshylary qatysty.
Jınalysta atalyp ótilgendeı, sońǵy jyldary jedel-izdestirý qyzmeti salasyndaǵy zańdylyqty nyǵaıtý, onyń qylmyspen kúrestegi tıimdiligin arttyrý boıynsha edáýir uıymdastyrýshylyq jáne praktıkalyq sharalar qabyldandy. Ýákiletti organdardyń jedel bólimderiniń kúsh-jigerimen 29 terrorıstik aktiniń aldy alyndy, uıymdasqan qylmystyq toptardyń 400-ge jýyq qatysýshylary qylmystyq jaýapkershilikke tartyldy, eki myńǵa jýyq asa aýyr qylmystar ashyldy.
Sonymen qatar, jedel qyzmetkerlerdiń kásipkerlik qyzmetke zańsyz aralasýy, olardyń kommertsııalyq qupııany quraıtyn málimetterdi prokýrordyń sanktsııasynsyz alýynyń faktileri jalǵasýda. Qylmystardy ashý boıynsha izdestirý qyzmetteri tıisti deńgeıde bolmaı otyr, sybaılas jemqorlyq qylmystaryn anyqtaý boıynsha arnaıy is-sharalardyń tıimdiligi tómen. Kópshiligi qylmystyń qurbanyna aınalǵan bolýy múmkin habar-osharsyz joǵalyp ketken azamattardy izdeýmen baılanysty problemalar sheshýdi talap etedi.
Ótken jyly prokýrorlar azamattardyń konstıtýtsııalyq quqyqtaryn qorǵaý maqsatynda zańsyz júrgizilip otyrǵan jedel-izdestirý is-sharalaryn toqtatý týraly 460-tan astam qaýly shyǵarǵan. Prokýrorlyq yqpal etý aktileri boıynsha qylmystyq qýdalaý organdarynyń úsh myńnan astam laýazymdy tulǵalary tártiptik jaýapkershilikke tartyldy.
Úılestirý keńesiniń músheleri - quqyq qorǵaý organdarynyń jetekshileri, sondaı-aq Joǵarǵy Sottyń basshylyǵy jedel-izdestirý qyzmetiniń nátıjelerin tııanaqty taldady, qylmyspen kúrestiń tıimdiligin odan ári arttyrý, azamattardyń quqyqtary men bostandyqtarynyń kepildigi júıesin nyǵaıtýǵa baǵyttalǵan vedomstvoaralyq ózara is-qımyldy odan ári kúsheıtý men úılesimdi sharalar qabyldaýdyń mańyzdylyǵyn atap kórsetti.
Talqylaý qorytyndysy boıynsha Úılestirý keńesi uıymdasqan qylmysqa, terrorızm jáne ekstremızmge, esirtki bıznesine, sybaılas jemqorlyqqa qarsy kúrestiń tıimdiligin arttyrýdy, uıymdasqan qylmystyq top qurý úshin jaýapkershilikti kúsheıtýdi, qylmystyq qol suǵýshylyqqa tap bolǵan azamattardy, sondaı-aq jasyrynyp júrgen qylmyskerlerdi izdeý tetikterin jetildirýdi zańnamalyq reglamentteýge baǵyttalǵan sharalar keshenin qabyldady.