Zańdy tulǵalardyń jemqorlyq qylmystaryna jaýapkershiligi kúsheıtiledi

<p>ASTANA. KAZINFORM &ndash; Búgin Májilistiń jalpy otyrysynda &laquo;Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly&raquo; zań jobasy men ilespe qujat birinshi oqylymda maquldandy.</p>

- Zańdy tulǵalardyń sybaılas jemqorlyq quqyq buzýshylyqtar jasaǵany úshin jaýapkershiligin kúsheıtý eskerilgen. Bul bastamany Sybaılas jemqorlyqqa qarsy saıasat tujyrymdamasyn jáne Birikken Ulttar Uıymynyń Sybaılas jemqorlyqqa qarsy konventsııasynan týyndaıdy. Konventsııa eger elde zańdy tulǵalardyń sybaılas jemqorlyq úshin ákimshilik jaýapkershiligi belgilengen bolsa da, onyń qylmystyq sanktsııalarǵa proportsıonaldy bolýyn mindetteıdi. 

Qazirgi ýaqytta Qazaqstanda Ákimshilik quqyq buzýshylyq týraly kodekstiń 678-baby boıynsha zańdy tulǵalardyń sheneýnikterge syıaqy bergeni úshin 750 AEK somasynda aıyppul túrinde ákimshilik jaýapkershiligi qoldanylady. Halyqaralyq standarttardy eskere otyryp, Ákimshilik quqyq buzýshylyq týraly kodekstiń osy babynyń Qylmystyq kodekstiń 367-babyna (para berý) uqsas eselengen aıyppul túrindegi sanktsııalardy kózdeıtin jańa redaktsııasy ázirlendi, - dedi QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov.

Onyń aıtýynsha, aıyppul syıaqy mólsherine baılanysty zańdy tulǵanyń atynan nemese onyń múddesi úshin berilgen materıaldyq syıaqynyń 30-dan 60 eselengenge deıingi somasyn quraıdy.

- Sondaı-aq zań jobalaryna quqyq qoldaný praktıkasynyń qorytyndylary boıynsha túzetýler engizildi. Máselen, arnaýly jáne quqyq qorǵaý organdary qyzmetkerleriniń ákimshilik sybaılas jemqorlyq quqyq buzýshylyqtar jasaǵany úshin ákimshilik jaýapkershiligin belgileý eskerilgen. Qazirgi kezde Ákimshilik quqyq buzýshylyq týraly kodekstiń 32-babyna sáıkes, áskerı qyzmetshilerdi qospaǵanda, kúsh organdarynyń qyzmetkerleri ákimshilik quqyq buzýshylyq jasasa tek tártiptik jaýaptylyqqa tartylady. Munymen qosa, kásipkerlik qyzmetke zańsyz aralasqany úshin memlekettik qyzmetshiler men olarǵa teńestirilgen adamdardyń ákimshilik jaýapkershiligin kúsheıtý usynylǵan, - dedi agenttik ókili.

Sonymen qatar, zań jobasynda sybaılas jemqorlyq qylmystar jasaǵan adamdardyń qyzmette odan ári joǵarylaýyn shekteý qarastyrylǵan.

Aıta keteıik, bul zań jobasy aıasynda aýyr jáne asa aýyr sybaılas jemqorlyq qylmystar jasaǵany úshin sottalǵandardyń jarııa tizilimi engiziledi.

Budan bólek, jemqorlyq táýekelderin joımaǵan basshylarǵa jaza qoldanylady.

Zań jobalary boıynsha zańsyz syıaqyny qorqytyp alý derekteri qatań baqylaýǵa alynady.

Qylmystyq kodekske para usynýdy jáne ony berýge ýáde etýdi krımınalızatsııalaý boıynsha túzetýler usynyldy.

Jemqorlyqpen kúres jónindegi zań «Múddeler qaqtyǵysy» atty jańa taraýmen tolyqtyrylyp jatyr.