Zańdastyrylmaǵan avtokólik júrgizýshiler qandaı jaýapqa tartylady

ASTANA. QazAqparat – Qazaqstanda esh zańdastyrylmaǵan 1,7 myń kólik aıyp turaǵyna jiberildi. Bul týraly QR ІІM Ákimshilik polıtsııa komıtetiniń tóraǵasy Qaısar Sultanbaev aıtyp berdi, dep habarlaıdy QazAqparat.

«Biz zańdastyrýdyń 2023 jyldyń 1 shildesine deıin jalǵasatynyn jarııaladyq. Kim zańdastyrýǵa úlgermedi, ótinim berińizder, 2023 jyldyń 1 shildesine deıin kelip túsken barlyq ótinimderdi qarastyramyz. Ázirge 15 myńǵa jýyq kólikti ýaqytsha tirkeýge aldyq. Ótinim berip úlgermegenderdi de qarastyramyz jáne ári qaraı tirkeımiz», - dedi Q. Sultanbaev Ortalyq kommýnıkatsııalar qyzmetinde.

Sonymen birge, spıker 2023 jyldan keıin ákelingen jáne saqtandyrý merzimi bitken, esh tirkeýsiz kólik minip júrgenderdiń bul kólikti basqarýǵa quqyǵy joq ekenin aıtty.

«Ákimshilik kodeks boıynsha olarǵa alǵashynda 10 AEK kóleminde aıyppul salynady. Biz qazir osyndaı aldyn alý jumystaryn júrgizip jatyrmyz. Ekinshi ret – ákimshilik hattama jasalyp, kólik aıyp turaǵyna qoıylady. Qazirgi ýaqytta saqtandyrýsyz, saqtandyrý polısinsiz, tehnıkalyq baıqaýsyz júrgen 2 myńnan astam kólik ıelerin anyqtadyq jáne olar ákimshilik jaýapqa tartyldy. Qazir 1,7 myńǵa jýyq kólik aıyp turaǵyna qoıyldy», - dedi Qaısar Sultanbaev.

Aıta keteıik, 2022 jyldyń 1 qyrkúıegine deıin elge zańsyz ákelingen kólik quraldaryn zańdastyrý 1 shildege deıin júrgizildi. Búgingi tańda barlyǵy 220 myńnan astam avtokólik zańdastyryldy.

Al 2022 jyldyń 1 qyrkúıeginen keıin ákelingen kólikter zańdastyrýǵa jatpaıdy.