Zańdastyrylǵan sheteldik kóliktiń 66 paıyzy Reseıden ákelingen

ASTANA. QazAqparat – Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev 23 qańtar men 30 maýsym aralyǵynda zańdastyrylǵan sheteldik kóliktiń 66 paıyzy Reseıden ákelingenin málim etti, dep habarlaıdy QazAqparat tilshisi.

«Іshki ister mınıstrligi elimizge 2022 jylǵy 1 qyrkúıekke deıin ákelingen sheteldik avtokólikterdi zańdastyrýǵa ótinimder qabyldady. Ótinimderdi ýaqytyly bergen, alaıda avtokólikterin zańdastyryp úlgermegen Qazaqstan azamattaryna belgilengen merzimnen keıin zańdastyrýǵa múmkindik berilip otyr.

ІІM zańdastyrý kezinde Joldaýda belgilengen talaptardy basshylyqqa alǵanyn atap ótkim keledi», - dedi ol ortalyq kommýnıkatsııalar qyzmetinde ótken brıfıngide.

Onyń aıtýynsha, zańdastyrýǵa:

-2022 jylǵy 1 qyrkúıekke deıin ákelingen avtokólikter;

- qylmystyq izdeýde bolmaǵan avtokólikter;

- kedendik tazartýdan ótken avtokólikter jatady.

«Sonyń nátıjesinde 206 myńǵa jýyq sheteldik avtokólik qazaqstandyq esepke qoıyldy.

Zańdastyrylǵan avtokólikterdiń basym kópshiligi Keden odaǵynyń quramyndaǵy úsh elge tıesili. Reseıden 136 myńnan astam, Armenııadan 37 myńnan astam avtokólik, Qyrǵyzstannan 22 myńnan astam avtokólik zańdastyryldy.

Óńirler arasynda zańdastyrylǵan avtokólikterdiń eń kóp sany bylaı boldy:

Almaty qalasynda – 26 115, Aqtóbe oblysynda – 20 876, Shymkent qalasynda – 15 145, Batys Qazaqstan oblysynda 14 204, Atyraýda 14 197, Qyzylorda oblysynda – 13 695 avtkólik», - dedi Ákimshilik polıtsııa komıtetiniń tóraǵasy.