Zańdastyrýǵa jatatyn kólikterdiń Qazaqstanǵa kirgen kúni qalaı aıqyndalady

ASTANA. QazAqparat – ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev shetelden ákelingen, zańdastyrylmaǵan kólikterdi memleket usynǵan jeńildik arqyly rásimdeý tártibin túsindirdi, dep habarlaıdy QazAqparat tilshisi.

«Zańdastyrylatyn avtokólikterge úsh negizgi talap qoıylady. Birinshisi – avtokólik izdeýde bolmaýy kerek. Ekinshisi – kedendik tazartýdan ótken bolýy tıis. Úshinshisi – 2022 jyldyń 1 qyrkúıegine deıin ákelingen bolýy qajet. Zańdastyrýǵa jatatyn kóliktiń «jasyna» jáne ekologııalyq klasyna eshqandaı talaptar qoıylmaıdy», - dedi ol ortalyq kommýnıkatsııalar qyzmetinde ótken brıfıngide.

Sondaı-aq, atalǵan kólikterdiń Qazaqstan aýmaǵyna kirgen kúnin aıqyndaý qandaı jolmen iske asatynyn málim etti.

«Kirý kúni Ulttyq qaýipsizdik komıteti Shekara qyzmetiniń nemese memlekettik kirister organdarynyń derekter bazasy boıynsha aıqyndalady. Búginde ol protsess tolyǵymen avtomattandyrylǵan. Sonymen qatar, shekara qyzmetinde nemese memlekettik kirister organdarynda kólik quralyn áketý týraly málimetter bolmaǵan jaǵdaıda avtokóliktiń Qazaqstan Respýblıkasynda naqty bolý kúni avtosaqtandyrý polısiniń alǵashqy rásimdelgen kúni boıynsha aıqyndalady», - dedi komıtet basshysy.

Buǵan deıin Qaısar Sultanbaev memleket usynǵan múmkindikti paıdalanbaı, sheteldik kóligin zańdastyrmaǵan adamdardyń eki-aq joly bar ekenin aıtqan bolatyn.Ol sondaı-aq, rýli oń jaqtaǵy kólikterdi zańdastyrý qajettigi neden týyndaǵanyn túsindirdi.