Zańdardyń Senatta qaralý ýaqytyn qysqartyp, óńirlerdiń múddesine negizgi basymdyq beremiz – Máýlen Áshimbaev

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev konstıtýtsııalyq reformalar Senattyń jumysyn qalaı jandandyratynyn túsindirdi, dep habarlaıdy QazAqparat tilshisi.

«Biz konstıtýtsııalyq ózgeristerden keıin palatanyń jumysyn ári qaraı jańǵyrtý máselesimen de aınalysamyz. Mysaly, zańdardy qaraý ýaqytyn qysqartý kerek. Keıbir zańdardy jyldam qaraý kerek. Keıbir kerek joq satylardy azaıtamyz. Munyń bári aldaǵy jumystar. Ol jumystardyń naqty nátıjesi zańdardy qaraý ýaqyty qysqarǵanymen, sapasyna kóp kóńil bólinedi. Bul da osy reformalardyń naqty nátıjesiniń biri dep qaraý kerek», - dedi Máýlen Áshimbaev QR Prezıdent teteradıokeshenine bergen suhbatynda.

Onyń aıtýynsha, usynylyp otyrǵan konstıtýtsııalyq reformada Senatqa birneshe jańa quzyret berilmekshi.

«Konstıtýtsııalyq Sottyń tóraǵasyn Prezıdenttiń taǵaıyndaýyna kelisim berý quzyreti bar. Sondaı-aq, Joǵarǵy Sot keńesiniń tóraǵasyn taǵaıyndaýǵa da Prezıdentke kelisim berý Senatqa júkteledi. Bular – Senattyń osy baǵyttaǵy quzyretin arttyratyn sheshimder. Jalpy osy reformanyń aıasynda Senattyń róli de artady, jańa quzyretter berilip, ári qaraı Senat óńirlerdiń múddesin júrgizetin negizgi ınstıtýt bolady dep aýyz toltyryp aıta alamyz», - dedi Senat spıkeri.

Aıta keteıik, búgin «Evrazııa» arnasynda saǵat 10:00-de, «Habar» - 12:45-te, «Qazaqstan» - 16:05-te, «Qazaq TV» - 20:15-te, «Almaty»- 20:35-te referendým týraly derekti fılm kórsetilip jatyr.