Zańda samokatshy degen uǵym joq, sondyqtan olar kólik júrgizýshi retinde qarastyrylmaıdy

ASTANA. QazAqparat – QR ІІM Ákimshilik polıtsııa komıteti tóraǵasynyń orynbasary Jandos Muratálıev samokat ıeleri jol erejesin buzǵanda qalaı jaýapqa tartylatynyn aıtty, dep habarlaıdy QazAqparat tilshisi.

«Bizde Jol júrisi týraly zańda da, jol qozǵalysy erejelerinde de «samokat» uǵymy joq. Sondyqtan, bıyl Saýda jáne ıntegratsııa mınıstrligi «Elektr samokaty» uǵymynyń standartyn ázirleýdi aıaqtady. Endi osy standart negizinde biz Jol júrisi týraly zańǵa jáne jol qozǵalysy erejelerine ózgerister engizemiz. Osydan keıin ákimshilik sharalar qoldanylady. Qazirgi ýaqytta samokatshylar kólik quralynyń júrgizýshileri retinde emes, «jol qozǵalysynyń basqa qatysýshylary» retinde ǵana jaýapqa tartylady», – dedi J. Muratálıev ortalyq kommýnıkatsııalar qyzmetindegi brıfıngte.

Sonymen birge, spıker velosıpedshiler de samokatshylar sekildi qaralatynyn, ereje buzǵan jaǵdaıda aıyppul salynǵan jaıaý júrginshiler statıstıkasyna «qozǵalystyń basqa qatysýshylary» retinde sanalatynyn aıtty.

Jyl basynan beri ereje buzǵan 216 myń adam osyndaı tizimge engen.