Zań jobasy: Qylmys rastalmasa isti basqa faktimen qazbalaýǵa jol berilmeıdi

ASTANA. QazAqparat - Elbasynyń eskertýine oraı, qaı faktimen is qozǵalsa, tergeý tek sol baǵytta júretin bolady.  Bul týraly Parlament Májilisiniń jalpy otyrysynda QR Bas prokýrory Jaqyp Asanov aıtty, dep habarlaıdy QazAqparat.

«Osy sessııa ashylǵanda Elbasy bizdi qatty synady. Sonda bizge: «bir fakti boıynsha isti bastaısyńdar, keıin dálel tappaısyńdar, sosyn basqa jaǵyn qazbalaı beresińder» dep aıtqan edi. Ol rasynda da solaı. Sondyqtan zań jobasy boıynsha bul tájirıbe múldem toqtatylady. Endi qaı faktimen is qozǵalsa, tek sonyń aıasynda tergeý júrgiziledi. Bul adam quqyǵyn kúsheıtýge qatysty bolyp otyr», - dedi Bas prokýror quqyq qorǵaý qyzmetiniń protsestik negizderin jańǵyrtýǵa baǵyttalǵan zań jobasy boıynsha baıandamasynda. 

Talqylaýdan keıin palata depýtattary zań jobasyn birinshi oqylymda maquldady.

Esterińizge sala keteıik, bıyl qazan aıynda Memleket basshysy Konstıtýtsııanyń 61-babynyń 1-tarmaǵyna sáıkes Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn engizdi.