Zań jobasy qazaq tilinde talqylanyp, qabyldanýy kerek – Májilis depýtaty

ASTANA. QazAqparat – Búgin Májilistiń jalpy otyrysynda depýtat Únzıla Shapaq zań jobalarynyń orys tilinde ázirlenip, qazaq tiline aýdarylatynyn synǵa aldy. Zań jobalary birinshi kezekte memlekettik tilde ázirlenýi tıis, dep habarlaıdy QazAqparat tilshisi.

«Táýelsizdik alǵannan beri elimizde 3589 zań qabyldandy. 30 jyldyń ishinde qazaq tili memlekettik til bolǵanymen, zaty memlekettik bola almady. Zań jobasy orys tilinde ázirlenip, qazaq tiline aýdarylatyny jasyryn emes. Osy kúnge deıin qazaq tilinde tek eki zań jobasy ázirlenip, qabyldanǵan. Atap aıtsaq, Tilder týraly, Kóshi-qon týraly zańdar ǵana. Zańnyń qazaq tilindegi mátinine qatysty syn-pikirler halyq arasynda óte kóp. Sonyń biri zań termıni birizdiliginiń saqtalmaýy. Memlekettik tildiń aıasyndaǵy keshendi problemalar qazaqstandyq quqyq júıesi keńistiginde bir-birimen sabaqtasyp, ushtasyp sonyń saldarynan túıtkildi máseleler bar. Qazaq jáne orys tilderi qurylymy turǵysynan ártúrli tildik toptarǵa jatady. Zań shyǵarý protsesinde osy erekshelikter eskerilmese, mátinderdiń maǵynalary burmalanyp, máni ózgeredi. Bul joǵaryda atalǵan sózbe-sóz nemese kalka aýdarmanyń áseri. Bundaı kemshilikke jol berýge áste bolmaıdy», - dedi Ú. Shapaq Úkimet basshysynyń orynbasary Altaı Kólginovtyń atyna joldaǵan saýalynda.

Osy oraıda ol birinshi kezekte zań jobasy qazaq tilinde talqylanyp, qabyldanýy kerek ekenin aıtty.

«Qazaq tilindegi termınqordy qalyptastyrýda oryn alyp jatqan kemshilikterdi ýaqtyly túzetip, termın shyǵarmashylyǵyn úzdiksiz damytyp, jetildirip, termınologııalyq jumystardy bir ortalyqtan úılestirip, kásiptik deńgeıde júrgizgende ǵana júıelengen ulttyq termınologııalyq qor qalyptasatyny aqıqat. Búginde qazaq tili termınderiniń biryńǵaı elektrondyq bazasynda 380 myńnan asa termın ornalastyrylǵan bolsa, onyń ishinde zańtaný salasynda 11 139 termın bekitilgen. Sol termınderdiń ózi jıi ózgeriske ushyraıdy», - dedi depýtat.